اسلام آباد: (دنیا نیوز) اسلام آباد ہائیکورٹ میں تعلیمی اداروں میں منشیات کیس کی سماعت کے دوران جج نے ریمارکس دیئے کہ بچوں کے لنچ باکس چیک کرنے ہوں گے کہ باہر سے کوئی چیز تو نہیں آ رہی؟
اسلام آباد ہائیکورٹ کے جسٹس راجہ انعام امین منہاس نے تعلیمی اداروں سے منشیات کے خاتمے سے متعلق کیس کی سماعت کی۔
عدالت نے وزارت داخلہ، اینٹی نارکوٹکس فورس (اے این ایف) اور اسلام آباد پولیس کو جنوری سے ستمبر 2025 تک کی پیشرفت رپورٹ دو ہفتوں میں پیش کرنے کی ہدایت کی۔
پولیس نے عدالت میں جنوری سے 22 اپریل 2025 تک کی رپورٹ پیش کی، جس کے مطابق اسلام آباد کے مختلف علاقوں سے 255 کلو گرام ہیروئن اور 126 کلو گرام چرس برآمد کی گئی، 689 مقدمات درج ہوئے اور 709 ملزمان کو گرفتار کیا گیا۔
وزارت داخلہ حکام نے بتایا کہ عدالتی حکم کے بعد سکولوں میں آگاہی مہم بھی چلائی گئی ہے۔
جسٹس راجہ انعام امین منہاس نے ریمارکس دیئے کہ صرف آگاہی سے بات نہیں بنے گی بلکہ مؤثر مانیٹرنگ بھی ضروری ہے، بچوں کے لنچ باکس بھی چیک کرنے ہوں گے تاکہ کوئی چیز باہر سے اندر نہ لائی جا سکے۔
عدالت نے کہا کہ منشیات کے خلاف پولیس کا جاری کردہ سلوگن کافی نہیں، عملی اقدامات کر کے دکھانا ہوں گے۔
عدالت نے قرار دیا کہ ایس ایچ اوز کی ذمے داری ہے کہ وہ اپنے علاقے کی نگرانی کریں، یہ نہیں کہ صرف رٹ دائر ہونے پر ہی ایکشن شروع کیا جائے، پرائیویٹ سکولز کی تنظیم پیرا کے وکیل نے عدالت کو بتایا کہ ادارے کی جانب سے بھی منشیات کے خاتمے کیلئے ڈائریکشن جاری کی گئی ہیں۔
بعد ازاں عدلت نے کیس کی مزید سماعت دو ہفتوں بعد تک کیلئے ملتوی کر دی۔
