لاہور: (دنیا نیوز) پنجاب حکومت نے بانی پی ٹی آئی کے ایکس (سابق ٹوئٹر) اکاؤنٹ سے 400 لاشوں کے جھوٹے بیانیے کے حوالے سے پیکا ایکٹ کے تحت مقدمہ درج کرنے کا فیصلہ کر لیا۔
وزیراعلیٰ پنجاب مریم نواز شریف کی زیر صدارت امن و امان سے متعلق دوسرا غیر معمولی اجلاس منعقد ہوا جس میں صوبے میں امن عامہ برقرار رکھنے اور شرپسند عناصر کے خلاف سخت اقدامات کا فیصلہ کیا گیا۔
اجلاس میں احتجاج کے نام پر فتنہ و فساد پھیلانے والوں کے خلاف گھیرا مزید تنگ کرنے اور ریاستی رٹ کو چیلنج کرنے والوں سے آہنی ہاتھوں سے نمٹنے کا فیصلہ کیا گیا۔
حکومتی اعلامیے میں کہا گیا ہے کہ ریاست کا ہدف کوئی مذہبی جماعت یا عقیدہ نہیں بلکہ فساد پھیلانے والے عناصر ہیں، کارروائیاں صرف ان افراد کے خلاف ہوں گی جن کا امن عامہ برباد کرنے کا ماضی رہا ہے۔
اجلاس میں بانی پی ٹی آئی عمران خان کے ایکس (سابق ٹوئٹر) اکاؤنٹ سے 400 لاشوں کے جھوٹے بیانیے کے حوالے سے پیکا ایکٹ کے تحت مقدمہ درج کرنے کا فیصلہ بھی کیا گیا۔
اجلاس میں مزید کہا گیا ہے کہ منبر اور مدارس کو نفرت کے فروغ یا اشتعال انگیزی کے لیے استعمال کرنے والوں کے خلاف دہشت گردی کے مقدمات درج کیے جائیں گے جبکہ مدارس کا تقدس مجروح کرنے اور بچوں کے ذہنوں میں نفرت کے بیج بونے والوں کے خلاف بھی کارروائی عمل میں لائی جائے گی۔
پنجاب حکومت نے کیلوں والے ڈنڈوں، پٹرول بم اور اسلحے کے استعمال پر مکمل پابندی عائد کرتے ہوئے ہدایت دی کہ لاؤڈ سپیکر قوانین کی خلاف ورزی پر فوری کارروائی کی جائے گی۔
حکومت نے واضح کیا کہ پنجاب بھر میں دفعہ 144 نافذ ہے اور اس کی خلاف ورزی کرنے والوں کے خلاف دہشت گردی ایکٹ کے تحت مقدمات درج کیے جائیں گے۔
اجلاس میں انتہا پسند جتھوں، ان کے سہولت کاروں اور حامیوں کے خلاف سخت کارروائی کا فیصلہ کرتے ہوئے کہا گیا ہے کہ بازار، دکانیں یا ٹرانسپورٹ زبردستی بند کرانے والوں پر بھی دہشت گردی ایکٹ لاگو ہوگا۔
مزید برآں سوشل میڈیا پر نفرت انگیز یا شرانگیز مواد پھیلانے والوں کے خلاف پیکا ایکٹ کے تحت کارروائی اور زیرو ٹالرنس پالیسی نافذ کرنے کا فیصلہ کیا گیا ہے۔
پنجاب حکومت نے ہدایت کی ہے کہ انتہا پسند گروہوں کی غیر قانونی سرگرمیوں پر مکمل پابندی ہوگی اور متعلقہ اداروں کو فوری ایکشن کے اختیارات دے دیئے گئے ہیں۔
