لاہور: (دنیا نیوز) وزارت مذہبی امور نے پرائیویٹ حج کی بکنگ کی ڈیڈ لائن میں 5 دن کی توسیع کر دی۔
وزارتِ مذہبی امور کے مطابق اب عازمین 22 اکتوبر 2025 تک منظور شدہ حج منظم کمپنیوں کے ذریعے بکنگ مکمل کر سکتے ہیں۔
ترجمان کے مطابق وزارت نے تمام منظور شدہ حج کمپنیوں کو ہدایت جاری کر دی ہے کہ وہ حج پالیسی 2026 اور سروسز پرووائیڈر ایگریمنٹ (SPA) کے مطابق بکنگ کو حتمی شکل دیں۔
اس سال پرائیویٹ حج سکیم کیلئے مجموعی طور پر 60 ہزار نشستیں مختص کی گئی ہیں جن میں سے اب تک 55 ہزار 500 نشستوں پر بکنگ مکمل ہو چکی ہے جبکہ ساڑھے چار ہزار نشستیں ابھی باقی ہیں۔
وزارت نے واضح کیا ہے کہ عازمین صرف وزارتِ مذہبی امور کی ویب سائٹ پر درج منظور شدہ حج کمپنیوں سے ہی رابطہ کریں، حج واجبات کی ادائیگی ہمیشہ بینکنگ چینل کے ذریعے کمپنی کے اکاؤنٹ میں کی جائے۔
عازمین سے کہا گیا ہے کہ وہ بکنگ کے وقت حج معاہدے کی کاپی اور کمپیوٹرائزڈ رسید لازمی حاصل کریں جبکہ اپنی بکنگ اور کوائف کی تصدیق وزارت کی ویب سائٹ یا “پاک حج 2026” موبائل ایپ کے ذریعے ضرور کریں تاکہ کسی ممکنہ مسئلے سے بچا جا سکے۔
