لاہور: (دنیا نیوز) وفاقی وزیر اطلاعات و نشریات عطا اللہ تارڑ نے کہا ہے کہ ہمیں مسلح افواج کی پیشہ ورانہ صلاحیتوں پر فخر ہے۔
لاہور میں فرسٹ پنجاب پیڈل چیمپئن شپ کی اختتامی تقریب سے خطاب کرتے ہوئے وفاقی وزیر اطلاعات و نشریات عطا اللہ تارڑ نے کہا کہ ملکی دفاع مضبوط ہاتھوں میں ہے، مسلح افواج نے ہمیشہ کسی بھی جارحیت کا منہ توڑ جواب دیا۔
انہوں نے کہا کہ پاکستان نے کھیل کے شعبے میں کئی کامیابیاں حاصل کی ہیں، پاکستان میں بہت ٹیلنٹ ہے، کھیل میں سیاست نہیں ہونی چاہیے، نوجوانوں کو زیادہ سے زیادہ سہولیات کی فراہمی ترجیح ہے، نجی شعبے کو کھیلوں کے فروغ کیلئے آگے آنا چاہیے۔
وفاقی وزیر کا مزید کہنا تھا کہ کامیاب سفارتی پالیسی کی بدولت دنیا بھر میں پاکستان کو پذیرائی مل رہی ہے، وزیراعظم کے دورہ سعودی عرب میں مختلف شعبوں میں تعاون پر بات ہوگی۔
