راولپنڈی: (دنیا نیوز) سکیورٹی فورسز نے بلوچستان کے علاقے چلتن اور کیچ میں دو کارروائیوں کے دوران فتنہ الہندوستان کے 18 دہشت گردوں کو جہنم واصل کر دیا۔
آئی ایس پی آر کے مطابق سکیورٹی فورسز کو چلتن کے پہاڑی علاقے میں دہشت گردوں کی موجودگی کی انٹیلی جنس معلومات ملیں جس پر سکیورٹی فورسز فوری حرکت میں آئیں اور آپریشن شروع کر دیا۔
ضلع کوئٹہ کے پہاڑی علاقے چلتن میں سکیورٹی فورسز اور بھارتی حمایت یافتہ دہشت گردوں کے درمیان فائرنگ کا شدید تبادلہ ہوا جس کے نتیجے میں 14 دہشت گرد مارے گئے۔
دوسرے آپریشن میں ضلع کیچ کے علاقے بلیدہ میں خفیہ اطلاع پر دہشت گردوں کی پناہ گاہ کو نشانہ بنایا گیا جہاں بھارتی حمایت یافتہ 4 دہشت گرد ہلاک ہو گئے۔
یہ خبر بھی پڑھیں: کُرم میں سکیورٹی فورسز کا آپریشن، 7 خوارج ہلاک، کیپٹن سمیت 6 جوان شہید
حکام نے بتایا کہ کیچ اور چلتن میں کارروائیوں کے دوران دہشت گردوں سے اسلحہ، گولیاں اور بارودی مواد بھی برآمد ہوا، مارے جانے والے افراد دہشت گردی کی کئی کارروائیوں میں ملوث تھے۔
آئی ایس پی آر کے مطابق انسداد دہشت گردی مہم کے تحت دہشت گردوں کے خاتمے کے لیے سرچ آپریشن جاری ہیں اور یہ آخری دہشت گرد کے خاتمے تک جاری رہیں گے۔
پاک فوج کے شعبہ تعلقات عامہ کی جانب سے کہا گیا ہے کہ پاکستان کی سکیورٹی فورسز اور قانون نافذ کرنے والے اداروں کی جانب سے وفاقی ایپکس کمیٹی کے منظور شدہ قومی ایکشن پلان کے تحت عزمِ استحکام کے وژن کے مطابق انسدادِ دہشت گردی مہم پوری قوت سے جاری رہے گی تاکہ بیرونی حمایت یافتہ دہشت گردی کے ناسور کو ملک سے مکمل طور پر ختم کیا جا سکے۔
صدر مملکت آصف علی زرداری نے چلتن اور بلیدہ میں کارروائی کے دوران 18 بھارتی سرپرستی یافتہ دہشت گردوں کے مارے جانے کو سکیورٹی فورسز کی بڑی کامیابی قرار دیا اور کہا کہ سکیورٹی فورسز کی جانب سے علاقے کی کلیئرنس دہشت گردی کے مکمل خاتمے کے عزم کی عکاس ہے۔
انہوں نے کہا کہ سکیورٹی فورسز اور قانون نافذ کرنے والے ادارے عزمِ استحکام کے تحت دہشت گردی کے مکمل خاتمے کے لیے پرعزم ہیں۔
وزیراعظم شہباز شریف نے کہا ہے کہ دہشت گردی کے خلاف جنگ میں پوری قوم سکیورٹی فورسز کے ساتھ کھڑی ہے، سکیورٹی فورسز کے عزم و حوصلے کو سلام پیش کرتے ہیں۔
انہوں نے کہا کہ ملک سے ہر قسم کی دہشت گردی کے مکمل خاتمے کے لئے پر عزم ہیں۔
علاوہ ازیں وفاقی وزیر داخلہ محسن نقوی نے کہا کہ سکیورٹی فورسز نے بروقت کارروائی کرکے بلوچستان میں بھارتی پراکسی فتنہ الخوارج کے ناپاک عزائم کو خاک میں ملا دیا۔
وزیراعلیٰ بلوچستان میر سرفراز بگٹی نے چلتن اور بلیدہ میں بھارتی سرپرستی یافتہ دہشت گردوں کے خلاف سکیورٹی فورسز کی کامیاب کارروائیوں پر اطمینان اور فخر کا اظہار کیا ہے۔
وزیراعلیٰ نے کہا کہ سکیورٹی فورسز نے عزمِ استحکام کے وژن کے تحت دہشت گردی کے مکمل خاتمے کے لیے اپنی پیشہ ورانہ مہارت، عزم اور بہادری کا شاندار مظاہرہ کیا۔
انہوں نے کہا کہ بلوچستان میں امن دشمن عناصر کے ناپاک عزائم کبھی کامیاب نہیں ہوں گے، صوبے کے عوام اور ریاستی ادارے امن و استحکام کے قیام کے لیے یکجا ہیں۔
