پشاور: (عامر جمیل) خیبرپختونخوا میں غیر قانونی طور پر مقیم افغان باشندوں کی بڑھتی ہوئی تعداد پر قانون نافذ کرنے والے اداروں نے تحفظات کا اظہار کیا ہے۔
محکمہ داخلہ اور خیبرپختونخوا پولیس نے صوبائی اسمبلی کی سپیشل سکیورٹی کمیٹی کو بریفنگ دیتے ہوئے بتایا کہ پنجاب اور آزاد کشمیر میں کریک ڈاؤن کے بعد ہزاروں افغان شہریوں نے خیبرپختونخوا میں رہائش اختیار کر لی ہے۔
بریفنگ میں بتایا گیا کہ علاقے میں ہونے والے متعدد جرائم اور دہشت گردی کی کارروائیوں میں غیر قانونی افغان باشندوں کے براہ راست ملوث ہونے کے شواہد ملے ہیں جس کے باعث صوبہ بھر میں ان کے خلاف آپریشن ناگزیر ہو چکا ہے۔
کمیٹی کو آگاہ کیا گیا کہ گزشتہ دو سال کے دوران افغان شہریوں کے خلاف حکومتی پالیسی کے تحت کوئی بڑا کریک ڈاؤن نہیں کیا گیا جس کے نتیجے میں ان کی تعداد میں نمایاں اضافہ دیکھنے میں آیا۔
واضح رہے کہ خیبرپختونخوا اسمبلی نے صوبے میں امن و امان کی صورتحال کا جائزہ لینے کے لیے 37 رکنی سپیشل سکیورٹی کمیٹی تشکیل دی ہے۔
کمیٹی کے اب تک دو اجلاس منعقد ہو چکے ہیں جن میں سکیورٹی اداروں نے موجودہ صورتحال، خطرات اور مجوزہ اقدامات پر تفصیلی بریفنگ دی ہے۔
