لاہور: (دنیا نیوز) کم عمر ڈرائیورز سے حادثات میں کمی نہ آسکی، نابالغ ڈرائیور معصوم شہریوں کی جانوں سے کھیلنے لگے۔
سندر نجی سوسائٹی لاہور میں کم عمر ڈرائیور کی تیز رفتاری سے 5 افراد زخمی ہوئے، تیز رفتاری گاڑی کے حادثے کی ویڈیو دنیا نیوز نے حاصل کر لی۔
ویڈیو میں دیکھا جا سکتا ہے کہ تیز رفتاری کے باعث گاڑی سڑک کے درمیان گرین بیلٹ پر چڑھتے ہوئے سڑک عبور کر کے ٹکرائی۔
کم عمر ڈرائیور عیشان کی غفلت اور لاپرواہی سے گاڑی مکمل تباہ ہو گئی، نابالغ ڈرائیور کی لاپرواہی، موٹر سائیکل سوار سمیت دو گاڑیوں کو نقصان پہنچا۔
پولیس نے مقدمہ تو درج کیا لیکن تاحال پولیس ملزم کو گرفتار نہ کر سکی، کیس کی تفتیش سست روی کا شکار ہے۔
واضح رہے کہ اس سے قبل بھی ڈیفنس میں کم عمر ڈرائیور نے ایک خاندان کے آٹھ افراد کی زندگیاں چھین لی تھیں، رواں سال میں اب تک لاہور میں کم عمر ڈرائیورز کی غفلت سے 25 افراد ہلاک اور 70 زخمی ہو چکے ہیں۔
ترجمان ٹریفک پولیس کا کہنا ہے کہ کم عمر ڈرائیور اگر کسی شہری کو زخمی کرتا ہے تو اس کے والدین کے خلاف مقدمہ درج ہو گا۔
