اسلام آباد: (ویب ڈیسک) پاکستان فٹبال ٹیم کے ہیڈکوچ اسٹیفن کانسٹنٹائن نے کہا ہے کہ پاکستان کو ایشیا کپ میں کوالیفائی کروانا ہے جس کے لیے مضبوط ٹیم بنانا ہوگی۔
اسلام آباد میں پریس کانفرنس کرتے ہوئے اسٹیفن کانسٹنٹائن کا کہنا تھا کہ ایک اور ورلڈ کپ کوالیفائنگ راؤنڈ میچ کے لیے پاکستان آنے پر خوش ہوں، امید ہے اردن ہمارے خلاف اچھی پرفارمنس نہیں دے گا۔
انہوں نے کہا کہ پاکستان کی فٹبال کو کافی عرصے سے جانتا ہوں، پاکستان نے ایشیا کی بہترین ٹیموں کے خلاف حال ہی میں کھیلا ہے۔ پاکستان کی فٹبال ٹیم کو تسلسل کے ساتھ میچز چاہئیں۔
اسٹیفن کانسٹنٹائن نے بتایا کہ جنوری میں پاکستان میں فٹبال کیمپ کا انعقاد ہوگا، پاکستان سعودی عرب کا دورہ کرے گا اور چند میچز کھیلے گا، پاکستان کو لیگ کی ضرورت ہے، لیگ ہوگی تو تجربہ اور کھلاڑی ملیں گے، پاکستان ورلڈکپ 2026 میں کوالیفائی نہیں کرنے والے بیان کو غلط سمجھا جاتا ہے۔
انہوں نے کہا کہ ہمیں حقیقت کو ماننا چاہیے، ہمیں اپنی ٹیم بنانی ہے، پاکستان کو ایشیاکپ میں کوالیفائی کروانا ہے، جب بھارت کا کوچ تھا تب ایشیاکپ میں کوالیفائی کروانے میں 4 سال لگے، پاکستان کو جنوبی ایشین ریجن میں بہتر ٹیم کے طور پر ابھر کر سامنے آنا ہوگا۔
پاکستان کے آئندہ میچ کے حوالے سے بات کرتے ہوئے ہیڈکوچ کا کہنا تھا کہ اردن کے خلاف میچ میں کھلاڑی پُرجوش اور بہتر محسوس کر رہے ہیں، میچ سے قبل تیاری کےلیے پاکستان کو 10 روز ملتے ہیں، ورلڈکپ کوالیفائنگ راؤنڈ میں پاکستان کو بڑے میچز مل رہے ہیں۔ ایشیاکپ کوالیفائنگ راؤنڈ بھی کھیلنا ہے۔
