اسلام آباد: (دنیا نیوز) ارشد ندیم کی ورلڈ ایتھلیٹکس چیمپئن شپ میں ناقص کارکردگی پر ایشین ایتھلیٹکس کے نائب صدر میجر جنرل (ر) محمد اکرم ساہی نے اظہار تشویش کرتے ہوئے جوڈیشل انکوائری کا مطالبہ کر دیا۔
میجر جنرل (ر) محمد اکرم ساہی میڈیا سے گفتگو کے دوران آبدیدہ ہوگئے، انہوں نے کہا کہ ارشد ندیم کی یہ کارکردگی ایک بہت بڑا سیٹ بیک ہے، 4 لوگوں کی وجہ سے ارشد ندیم کی ورلڈ ایتھلیٹکس چیمپئن شپ میں ناکامی ہوئی ہے۔
محمد اکرم ساہی نے کہا کہ ایتھلیٹکس فیڈریشن آف پاکستان نے دس سال محنت کرکے ارشد ندیم کو ٹاپ پر پہنچایا تھا، اولمپکس کے بعد دو سے تین لوگوں نے ارشد ندیم کو کنٹرول کیا جس کا نتیجہ آج سب کے سامنے ہے۔
نائب صدر ایشین ایتھلیٹکس نے کہا کہ ان لوگوں نے ایتھلیٹکس فیڈریشن کی میری ٹیم کی محنت پر پانی پھیر دیا ہے، ارشد ندیم کو فیڈریشن سے دور کرکے معاملات دو تین لوگوں نے ہاتھ میں لیے جس کا نقصان ہوا۔
محمد اکرم ساہی نے کہا کہ کبھی سوچ بھی نہیں سکتا تھا کہ ارشد ندیم کی کارکردگی کا گراف اتنا نیچے جائے گا، میں صاحب اقتدار سے کہوں گا کہ اس معاملے کی جوڈیشل انکوائری ہونی چاہئے۔
نائب صدر ایشین ایتھلیٹکس نے کہا کہ قوم کے پیسے سے ارشد ندیم کو ایک بلند مقام پر پہنچایا تھا۔
