نیو یارک: (روزنامہ دنیا) اب ملازمتوں کا حصول فیس بک سے بھی ممکن ہے۔ فیس بک نے آخرکار پاکستان میں اپنا جاب فیچر متعارف کرا دیا ہے جو کافی عرصے پہلے امریکہ میں متعارف کرایا گیا تھا اور پھر دیگر ممالک میں اسے پیش کیا۔
اس فیچر کی مدد سے فیس بک پیجز کو چلانے والے جاب پوسٹ کرنے کے ساتھ ساتھ امیدواروں کی سی ویز بھی موصول کر سکیں گے جبکہ امیدوار اپنی مطلوبہ پوسٹ پر فیس بک کی مدد سے اپلائی کرسکیں گے۔
جابز کا یہ آپشن نیوزفیڈ پر بائیں جانب ایکسپلور کے سیکشن میں کہیں موجود ہوسکتا ہے جو ڈیسک ٹاپ سائٹ پر بائیں جانب ہو گا۔ اس نئے فیچر میں صارفین کے سامنے اپنے شہر یا قریبی علاقوں میں دستیاب ملازمتوں کے مواقع سامنے آئیں گے اور پیجز کے اشتہارات میں کسی ملازمت کو متعلقہ تفصیلات جیسے تنخواہ وغیرہ کے ساتھ شیئر کیا جائے گا، تو وہ نظر آئے گا۔
ہر اشتہار کے ساتھ اپلائی ناؤ کا بٹن بھی ہو گا، جس پر کلک کرنے پر آپ کے سامنے ایک پوپ اپ ونڈو میں آپ کا نام، فون نمبر، شہر کا نام اور ای میل ایڈریس آجائیں گے جبکہ ملازمت کا تجربہ، تعلیم وغیرہ بھی درج ہو گی (اگر آپ نے پروفائل تفصیلات میں بھری ہو تو)، اس کے علاوہ نئی جاب اوپننگ کے نوٹیفکیشن کی اجازت ہو گی۔
