کیلیفورنیا: (ویب ڈیسک)ایلون مسک کی جانب سے ٹویٹر خریدنے کے بعد محض 6 ماہ کے دوران سماجی رابطے کی ویب سائٹ کی مالیت 50 فیصد سے زائد گر گئی۔
یاد رہے کہ دنیا کے دوسرے امیر ترین شخص ایلون مسک نے اکتوبر 2022 میں 44 ارب ڈالرز میں سوشل میڈیا پلیٹ فارم ٹوئٹر کو خریدا تھا۔
برطانوی خبر رساں ادارے رائٹرز کی رپورٹ کے مطابق محض چھ ماہ کے عرصے کے بعد انہوں نے تسلیم کیا کہ سماجی رابطے کی ویب سائٹ ٹوئٹر کی مالیت 50 فیصد سے بھی زائد گر گئی ہے اور یہ لگ بھگ 20 ارب ڈالرز تک پہنچ گئی ہے، ایلون مسک نے سٹاک گرانٹس کے حوالے سے ای میل میں اعتراف کیا۔
ایلون مسک نے ٹوئٹر کے ملازمین کو آگاہ کیا کہ ان کی مالی مراعات کو کمپنی کے ساتھ منسلک کیا جائے گا۔ اسی دوران مسک نے کمپنی کے ملازمین کو 20 ارب ڈالرز کی مالیت کے مطابق سٹاک گرانٹس دینے کی پیشکش کی۔
ٹویٹر کے نئے مالک نے عملے کو بتایا کہ کمپنی کی مالیت 250 بلین ڈالرز تک پہنچانے کے لیے مشکل مگر واضح راستہ پر گامزن ہیں۔
