نیویارک : ( ویب ڈیسک ) امریکی ٹرانسپورٹیشن کے سربراہ کا کہنا ہے کہ چینی خود مختار گاڑیوں کی ٹیکنالوجی نے خدشات کو جنم دیا ہے۔
غیر ملکی خبر رساں ادارے کے مطابق امریکی ٹرانسپورٹیشن سیکرٹری پیٹ بٹگیگ کا کہنا تھا کہ ان کی ایجنسی کو امریکی مارکیٹ میں چینی خود مختار گاڑیاں فراہم کرنے والوں کے بارے میں قومی سلامتی کے خدشات ہیں۔
بٹگیگ نے ایک انٹرویو میں کہا کہ امریکا کو مختلف کاروباری اداروں کی حقیقی ملکیت کو بہتر طور پر سمجھنے کی ضرورت ہے جو ہمارے نقل و حمل کے نظام کے مختلف عناصر فراہم کر رہے ہیں۔
بٹگیگ اور سیکرٹری آف کامرس جینا ریمنڈو کو 17 جولائی کو لکھے گئے خط میں چار قانون سازوں کے ایک گروپ نے ریاستہائے متحدہ میں چینی اے وی ٹیکنالوجی کے پھیلاؤ کے بارے میں تحقیقات کا مطالبہ کیا۔
قانون ساز امریکا میں خاص طور پر اے وی گاڑیوں اور آلات کی جانچ کے بارے میں فکر مند ہیں۔
ان کے خط میں امریکی ریاست کیلیفورنیا کے ریگولیٹرز کے اعداد و شمار کا حوالہ بھی دیا گیا جس میں بتایا گیا کہ سات چینی فرموں نے گزشتہ سال سب سے زیادہ آبادی والی امریکی ریاست میں خود مختار گاڑیوں کا تجربہ کیا ہے۔
