بیجنگ: (روزنامہ دنیا) سیب عام طور پر سبز، سرخ، پیلے یا ان کے ملے جلے رنگوں میں ہوتے ہیں لیکن تبت کے پہاڑوں پر گہرے جامنی سیب پائے جاتے ہیں جن پر سیاہ رنگ کا گمان ہوتا ہے۔ سیاہ بیجوں والے سیب دراصل چین میں مشہور ہوا نائیو سیب (چین کے سرخ لذیذ) کی نسل سے ہیں۔
تبت کے خود مختار خطے کے ایک علاقے نیانگ چی میں یہ سیب پائے جاتے ہیں۔ سطح سمندر سے 3100 میٹر کی بلندی پر ایک چینی کمپنی نے یہاں 50 ہیکٹر پر باغات لگائے ہیں، اس علاقے میں دن اور رات میں درجہ حرارت کا خاصا فرق پایا جاتا ہے۔ دن میں خوب دھوپ پڑتی ہے اور اس کی الٹرا وائلٹ روشنی سے سیب کی رنگت مزید گہری ہوتی جاتی ہے یہاں تک کہ وہ گہرے جامنی رنگ کے ہو جاتے ہیں اور دور سے کالے دکھائی دیتے ہیں۔
پہلی مرتبہ سیاہ جامنی سیب 2015 میں اگنا شروع ہوئے تھے، یہ مہنگی ترین مارکیٹوں میں فروخت کئے جاتے ہیں۔ ایک سیب کی قیمت 7 ڈالر ہے تاہم اپنی رنگت کی بنا پر ان کی افزائش بہت سست ہوتی ہے۔ عام سیب کا درخت 3 سے 5 برس میں پیداوار دینا شروع کرتا ہے لیکن اس کی پیداوار 8 سال سے پہلے ممکن نہیں ہوتی۔ ان میں سے بھی صرف 30 فیصد سیب ایسے ہیں جو مکمل سیاہ ہونے پر پورا اترتے ہیں اور اچھے داموں فروخت ہوتے ہیں۔
