نئی دہلی: (ویب ڈیسک) بھارت کی بڑی ریاستوں میں سے ایک ریاست بہار کا بیلوا ٹانڈا گاؤں جہاں سڑکوں پر بجلی کے کھمبے اور گھروں میں بجلی کے میٹر تو لگ گئے لیکن بجلی کی سہولت میسر نہیں آسکی۔
تفصیلات کے مطابق بھارتی ریاست بہار کے ضلع گیا کا بیلوا ٹانڈا گاؤں جو آزادی کے بعد سے آج تک بجلی جیسی بنیادی سہولت سے محروم ہے، حکام نے 3 سال قبل گاؤں کی سڑکوں پر بجلی کے کھمبے اور گھروں میں بجلی کے میٹر تو لگا دیئے لیکن آج تک گاؤں والوں کو بجلی کی سہولت مہیا نہیں کی جاسکی۔
بیلوا ٹانڈا گاؤں گیا ہیڈا کوارٹر سے درجنوں میل دور نہیں بلکہ صرف 7 کلو میٹر دور ہے۔ محکمہ بجلی کے افسران نے بھی اس مسئلے پر خاموشی اختیار کر رکھی ہے۔
گاؤں میں رہنے والے افراد کا کہنا ہے کہ تین سال قبل بجلی کے کھمبے اور میٹر لگائے گئے اور دو سے تین دن کے لیے بجلی کی سپلائی بھی ہوئی لیکن اس کے بعد سے سپلائی جو معطل ہوئی آج تک بحال نہیں ہوسکی، اب تو تار گرنے لگے ہیں اور میٹر بھی خراب ہوگئے ہیں
حیرانی کی بات یہ ہے کہ بجلی کی فراہمی نہ ہونے کے باوجود بھی گاؤں والوں کو بجلی کا بل بھیجا جاتا ہے۔
ایگزیکٹیو انجینئر اندر دیو کا کہنا ہے کہ بجلی کے تار، کھمبے اور ٹرانسفرمر ہیں تو بہت جلد بجلی کی فراہمی بھی ہوگی۔انہوں نے کہا کہ گاؤں میں بجلی نہ ہونے سے متعلق مجھے علم نہیں تھا، مقامی افسران سے اس سے متعلق معلومات حاصل کر کے جلد کارروائی کی جائے گی۔
