آسٹریلیا میں بلبلہ گھر برائے فروخت، قیمت 10 لاکھ ڈالر

کوئنزلینڈ: (روزنامہ دنیا) آسٹریلیا میں ایک ‘‘بلبلہ گھر’’ برائے فروخت ہے جس کی ابتدائی قیمت ‘صرف’ دس لاکھ آسٹریلین ڈالر رکھی گئی ہے۔

میڈیا رپورٹ کے مطابق اپنے پورے احاطے سمیت یہ پورا گھر کئی ایکڑ پر پھیلا ہوا ہے۔ خاص بات یہ ہے کہ اس میں مرکزی عمارت کا ہر حصہ اور ہر کمرہ ایک بلبلے کی شکل میں بالکل گول بنایا گیا ہے۔ دور سے دیکھنے پر ایسا لگتا ہے جیسے بہت سارے دیوقامت انڈے ایک ساتھ زمین پر رکھ دئیے گئے ہوں۔

گھر کی کھڑکیاں دیکھ کر گمان ہوتا ہے جیسے آنکھ کی بہت بڑی بڑی پتلیاں ہوں۔ اس گھر میں کل 11 کمرے ہیں۔ آسٹریلیا کے صوبے کوئنزلینڈ کے علاقے اپس وک میں موجود یہ ‘‘بلبلہ گھر’’ آسٹریلیا کے مشہور ماہرِ تعمیرات گراہم بریچل نے ڈیزائن اور تعمیر کیا ہے۔ انہیں اس عجیب و غریب ساخت والا گھر بنانے کا خیال مریخ کیلئے تصوراتی انسانی کالونیوں کے ڈیزائن دیکھ کر آیا۔