فیصل آباد: (دنیا نیوز) فیصل آباد کی گورنمنٹ کالج یونیورسٹی برائے خواتین کے شعبہ فائن آرٹس میں طالبات کے فائنل تھیسز کی نمائش سجائی گئی جس میں طالبات نے صلاحیتوں کے خوب جوہر دکھائے۔
فیصل آباد کی گورنمنٹ کالج یونیورسٹی برائے خواتین کے شعبہ فائن کی آرٹس کی طالبات کی جانب سے فائنل سمسٹر کے تھیسز کی تین روزہ نمائش سجائی گئی۔ نمائش میں مجموعی طور پر 9 طالبات نے اپنے تھیسز کی رونمائی کی۔ نمائش میں رکھی ہر پینٹنگ اور ماڈل طالبات کی عمدہ کارکردگی کی عکاسی کررہا تھا۔ طالبات کے شاندار شاہکاروں کو دیکھنے والوں کی جانب سے انہیں سراہا گیا تو طالبات کی خوشی دیدنی تھی۔
طالبات کی عمدہ پرفارمنس پر ان کی اساتذہ بھی خوش دکھائی دیں۔ اساتذہ اور یونیورسٹی انتظامیہ کا کہنا تھا کہ نمائش کے انعقاد کا مقصد طالبات کو اپنے ہنر کا لوہا منوانے کیلئے بہتر پلیٹ فارم فراہم کرنا تھا۔
طالبات کی اپنے شعبہ میں مہارت کو دیکھ کر یہ بخوبی اندازہ لگایا جاسکتا ہے کہ آنے والے وقت میں وہ اپنا نام پیدا کرنے کی خوب صلاحیت رکھتی ہیں۔
