تازہ ترین
  • National :- آرمی چیف جنرل قمرجاویدباجوہ سےبرطانوی ہائی کمشنرکی ملاقات
  • National :- باہمی دلچسپی کےامور،خطےکی سیکیورٹی صورتحال پرتبادلہ خیال
  • National :- ملاقات میں افغان امن عمل پربھی تبادلہ خیال،آئی ایس پی آر
  • National :- کوروناسےنمٹنےکیلئےتعاون کےحوالےسےبات چیت،آئی ایس پی آر

24 ہزار سال منجمد رہنے کے بعد کثیر خلوی جاندار دوبارہ متحرک

Published On 09 June,2021 05:34 pm

ماسکو: (ویب ڈیسک) نئی سائنسی تحقیق کے مطابق سائبیریا میں 24 ہزار سال منجمد رہنے کے بعد بھی خرد بینی کثیر خلوی جاندار ڈیلائڈ روٹیفر زندگی کی طرف واپس لوٹ آیا۔

برطانوی خبر رساں ادارے بی بی سی کی رپورٹ کے مطابق سائنسدانوں نے ڈیلائڈ روٹیفر نامی اس جاندار کو دریائے عالیزہ سے کھود کر نکالا ہے۔ ہزاروں برس بعد جب جمی حالت سے باہر آیا تو بغیر ازدواجی تعلقات کے افزائش نسل کے قابل تھا۔

اس سے قبل تحقیق میں کہا گیا تھا کہ 10 سال تک اس حالت میں زندہ رہ سکتے ہیں۔ پیر کو کرنٹ بائیولوجی نامی جریدے میں شائع ہونے والی تحقیق کے مطابق خلیے اگر لامتناہی مدت کے لیے نہیں بھی تو کئی ہزار سال تک زندہ رہ سکتے ہیں۔

روس کے انسٹیٹیوٹ آف سائیکوکیمیکل اینڈ بائیولوجیکل پرابلمز اِن سوائل سائنس کے سٹاس ملاوین نے پریس ایسوسی ایشن کو بتایا کہ تحقیق کا خلاصہ یہ ہے کہ یہ کثیر خلوی جاندار کئی ہزار سال تک منجمد رہنے کے بعد بھی واپس زندگی میں پہلے کی طرح آ جاتے ہیں جو کہ افسانہ نگاروں کے لیے خواب کی تکمیل کے برابر ہے۔

ان کے مطابق ابھی یہ دیکھنے کے لیے مزید تحقیق کی ضرورت ہے کہ یہ سب کس طرح ممکن ہو سکا ہے۔ سائنسدانوں نے اس عمل کے مشاہدے کے لیے درجنوں جانوروں کو ایک لیبارٹری میں منجمد کیا اور پھر پگھلایا۔

ریڈیو کاربن ڈیٹنگ کے مطابق اس ڈیلائڈ روٹیفر کی عمر 23960 سے لے کر 24485 سال کے درمیان ہو سکتی ہے۔ ڈیلائڈ روٹیفر دنیا بھر میں تازہ پانی میں پائے جاتے ہیں۔ ان کے نام کے ساتھ روٹیفر ایک لاطینی زبان سے لیا گیا ہے جس کا مطلب ہوتا ہے کہ ’پہیے والا‘۔ خلیوں کی خاص بات انتہائی شدید ناموافق حالات میں بھی زندہ رہنا ہوتا ہے۔

نیو یارک ٹائمز میں شائع ہونے والی رپورٹ کے مطابق یہ زمین پر ریڈیائی شعاعوں کا مقابلہ کرنے کی سب سے زیادہ صلاحیت رکھنے والے جانداروں میں شامل ہیں اور اس کے علاوہ کم آکسیجن، خوراک کی کمی، تیزابیت کی زیادتی کے ساتھ اور کئی برس تک جسم میں پانی کی کمی کے باوجود زندہ رہ سکتے ہیں۔