کاغذ سے بنے جہاز کی سب سے لمبی پرواز کا نیا عالمی ریکارڈ قائم

کراؤن پوائنٹ: (ویب ڈیسک) امریکا کی ریاست انڈیانا کے شہر کراؤن پوائنٹ میں کاغذ سے بنے جہاز کی سب سے لمبی پرواز کا نیا عالمی ریکارڈ قائم ہوگیا۔

گیریٹ جینسن، نیتھن ایرکسن اور ڈلن روبل نامی انجینئرز نے 2 دسمبر 2022 کو کاغذ کا ایسا جہاز بنانے کا فیصلہ کیا جو طویل ترین پرواز کر سکے، انجینئر دوستوں کے بنائے کاغذی جہاز نے 88.31 میٹر طویل مسافت طے کر کے سب سے زیادہ وقت تک پرواز کا نیا عالمی ریکارڈ اپنے نام کر لیا۔

— Guinness World Records (@GWR) February 22, 2023

گینیز بک آف ورلڈ ریکارڈ کے مطابق کاغذی ہوائی جہاز کی 289 فٹ 9 انچ طویل پرواز ہوئی۔

کاغذ کا جہاز بنانے والے ڈلن روبل اور گیریٹ جینسن کا کہنا ہے کہ انہیں بچپن سے ہی کاغذ کے طیارے بنانے کا شوق تھا، انہوں نے مختلف ڈیزائن کے ہوائی جہاز بنانے کی کوشش کی جو آواز کی رفتار سے 5 گنا زیادہ تیز اُڑ سکتے تھے۔

کافی تحقیق کے بعد وہ اے 4 کاغذ سے 20 منٹ میں ایک چھوٹا طیارہ بنانے میں کامیاب ہوئے جس کا نام انہوں نے مارچ 5 رکھا۔

جینسن نے کہا کہ گنیز ورلڈ ریکارڈ کے لیے ہم نے کاغذ کے وزن کو یقینی بنایا تھا کہ جتنا وزن میں بھاری ہو گا اتنی ہی دور تک جائے گا۔

انہوں نے کہا کہ آخر کار ہمارے کاغذی جہاز نے 88.31 میٹر دور تک پرواز کر کے 77 میٹر پرواز کا ریکارڈ توڑ دیا۔