سٹاک ہوم: (ویب ڈیسک) اگر آپ لاجسٹکس نامی فلم کو دیکھنے کا ارادہ رکھتے ہیں تو آپ کے پاس ایک ماہ سے زائد کا وقت ہونا چاہیے کیونکہ اسے مکمل دیکھنے کیلئے 35 دن 17 گھنٹے کا وقت درکار ہوتا ہے۔
فلم لاجسٹکس سوئیڈن میں بنائی گئی ہے جو کہ روایتی فلموں سے بالکل مختلف ہے، عام طور پر فلمیں ڈیڑھ سے تین گھنٹے تک طویل ہوتی ہیں جبکہ یہ فلم ایک مہینے سے بھی زیادہ طویل ہے۔
لاجسٹکس ایک تجرباتی فلم ہے جس کا آغاز اس سوال سے ہوتا ہے کہ تمام ڈیوائسز کہاں سے آتی ہیں؟، فلم کو ایریکا اور ڈینئل انڈرسن نے ڈائریکٹ کیا ہے جس میں اس سوال کا جواب جاننے کی کوشش کی گئی ہے۔
اس فلم میں ناظرین کو ایک ٹرک، مال گاڑی، کنٹینر اور بحری جہاز کا سفر بالکل رئیل ٹائم میں دکھایا جاتا ہے جو فلم کے دورانیے کو بڑھاتا ہے، آخر میں یہ فلم ناظرین کو اس فیکٹری تک لے جاتی ہے جہاں وہ ڈیوائسز تیار ہوئیں۔
ایسے شائقین جن کے پاس زیادہ وقت نہیں ہوتا ان کیلئے فلم لاجسٹکس کا 72 منٹ کا ایک ورژن بھی تیار کیا گیا جوکہ اس طویل فلم کی ایک سمری ہے تاہم اس فلم کا مجموعی دورانیہ 857 گھنٹے یا 51 ہزار 420 منٹ بنتا ہے۔
