اتر پردیش: (ویب ڈیسک) ڈاکٹروں سے علاج کے باوجود افاقہ نہ ہونے پر نوجوان نے یوٹیوب ویڈیوز دیکھ کر خود ہی اپنا آپریشن کر ڈالا۔
بھارتی ریاست اتر پردیش کے ضلع متھورا سے تعلق رکھنے والا 32 سالہ راجا بابو کئی دنوں سے شدید پیٹ درد میں مبتلا تھا اور متعدد ڈاکٹروں سے علاج کے باوجود آرام نہ ملنے پر اس نے خود اپنا آپریشن کرنے کا فیصلہ کیا۔
راجا بابو نے یوٹیوب پر مختلف ویڈیوز دیکھنے کے بعد ایک میڈیکل سٹور سے دوائیں، جراحی کے اوزار، ٹانکے لگانے کا سامان اور بے ہوشی کے انجکشن خریدے، بدھ کی صبح اس نے اپنے کمرے میں آپریشن شروع کیا لیکن کچھ دیر بعد بے ہوشی کی دوا کا اثر ختم ہوتے ہی شدید تکلیف میں مبتلا ہوگیا اور چیخنے لگا، اس کی چیخیں سن کر اہل خانہ حیران رہ گئے اور فوراً اسے ہسپتال منتقل کیا۔
واقعے کی تصدیق کرتے ہوئے راجا بابو کے بھتیجے راہول نے بتایا کہ اس کے چچا نے یوٹیوب ویڈیوز دیکھ کر خود آپریشن کرنے کی کوشش کی۔
راہول نے مزید بتایا کہ 18 سال قبل راجا بابو کی اپنڈکس کی سرجری ہو چکی تھی لیکن حالیہ دنوں میں وہ دوبارہ پیٹ درد میں مبتلا تھا، جب ڈاکٹروں سے علاج کے باوجود افاقہ نہ ہوا تو اس نے خود اپنا علاج کرنے کا فیصلہ کیا تاہم حالت بگڑنے پر اسے فوری طور پر آگرہ کے ایس این ہسپتال ریفر کر دیا گیا۔
