میڈرڈ:(ویب ڈیسک) سپین میں مایونیز ختم ہوجانے پر گاہگ نے ایک کیفے کو آگ لگا دی۔
یہ واقعہ سپین کے سیویل صوبے کے شہر لاس پیلاشیوس میں پیش آیا جہاں ایک 50 سالہ گاہک نے مایونیز نہ ملنے پر کیفے کو آگ لگائی، گاہک نے دو مرتبہ مایونیز مانگا لیکن عملے نے بتایا کہ ان کے پاس نہیں ہے کیونکہ بار میں کچن نہیں ہے اور سینڈوچ پہلے سے تیار شدہ تھے۔
اس پر غصے میں آ کر وہ آپے سے باہر گیا، قریبی پٹرول سٹیشن سے تیل لے کر واپس آیا، بار پر چھڑک کر آگ لگا دی۔
آگ بھڑکنے سے کیفے میں موجود لوگ خوفزدہ ہو کر بھاگ نکلے، عملے نے فوری طور پر فائر ایکسٹنگشر کا استعمال کر کے آگ پر قابو پایا، اس واقعے میں صرف ملزم ہی زخمی ہوا جبکہ دیگر افراد محفوظ رہے اور کیفے کو تقریباً 7000 یورو کا نقصان پہنچا۔
پولیس نے ملزم کو گرفتار کر کے طبی امداد کیلئے سینٹر منتقل کر دیا ہے جس کے بعد اسے عدالت میں پیش کیا جائے گا۔
کیفے کے مالک جوز اینٹونیو نے اس واقعے کو عجیب و غریب قرار دیتے ہوئے کہا ہے کہ گاہگ کے اس عمل کی کوئی وضاحت نہیں دی جا سکتی۔
