لندن: (ویب ڈیسک) برطانیہ کے ایک فارم نے دو غیر معمولی گدھوں کی بدولت عالمی سطح پر شہرت حاصل کر لی ہے جنہیں گنیز ورلڈ ریکارڈ بک میں شامل کر لیا گیا ہے۔
انگلینڈ کے علاقے لنکن شائر میں واقع ریڈکلف ڈونکی سینکچوری میں موجود یہ گدھے نہ صرف اپنی خوبصورتی بلکہ اپنے حیران کن ریکارڈز کی وجہ سے دنیا بھر میں زیرِ بحث موضوع بنے ہوئے ہیں۔
دو دوست گدھے ڈائنامک ڈیرک اور بامبو اب باضابطہ طور پر گنیز ورلڈ ریکارڈز 2026 میں شامل ہو چکے ہیں، ڈیرک نے دنیا کا سب سے اونچا گدھا ہونے کا اعزاز حاصل کیا ہے، جب کہ اس کے قریبی دوست بامبو کو سب سے لمبے کانوں والے گدھے کا ریکارڈ مل گیا۔
ڈیرک کی اونچائی حیرت انگیز طور پر 167 سینٹی میٹر (5 فٹ 5 انچ) ہے، جو ایک عام گدھے کے مقابلے میں تقریباً بیس سینٹی میٹر زیادہ ہے، اس غیر معمولی قامت نے اسے دنیا بھر میں مقبول بنا دیا ہے۔
فارم کی مالک ٹریسی گارٹن کے مطابق لوگ اکثر سمجھتے ہیں کہ ڈیرک خچر ہے کیونکہ وہ اتنا بڑا ہے، مگر دراصل وہ خالص نسل کا امریکی میمتھ جیک سٹاک گدھا ہے۔
دلچسپ بات یہ ہے کہ ڈیرک کی یہ جسامت خاندانی وراثت کا نتیجہ ہے، اس گدھے کی ماں مس ایلی بھی غیر معمولی قد والی تھی اور اس کے والد لویس کا قد بھی پانچ فٹ سے زیادہ تھا، ڈیرک ایک نرم دل اور پیار کرنے والا جانور ہے جو لوگوں کے ساتھ وقت گزارنا پسند کرتا ہے، وہ ادرک والے بسکٹ اور گاجریں کھانے کا شوقین ہے اور اکثر اس کو دیکھنے والوں کے پیچھے پیچھے چلتا ہے جیسے کوئی وفادار کتا۔
دوسری جانب ڈیرک کا ہمسایہ بامبو اپنے لمبے، ریشمی کانوں کی بدولت توجہ کا مرکز بنا ہوا ہے، اس کے کانوں کی لمبائی 35 سینٹی میٹر (ایک فٹ ایک انچ) ناپی گئی ہے، جو دنیا کے کسی بھی دوسرے گدھے سے زیادہ ہے، بامبو نہ صرف ظاہری طور پر منفرد ہے بلکہ اپنی خوش مزاجی اور نرم طبیعت کے باعث سینکچوری کا سب سے زیادہ گود لیا جانے والا گدھا بھی ہے۔
ٹریسی گارٹن کے مطابق بامبو کے لمبے، پھول دار کان اسے نہ صرف خوبصورت بناتے ہیں بلکہ زائرین کا دل بھی جیت لیتے ہیں، سب یہاں آ کر سب سے پہلے بامبو کے بارے میں پوچھتے ہیں، وہ سب کا فیورٹ ہے۔
