نئی دہلی: (ویب ڈیسک) کورونا وائرس کی وباء نے دنیا بھر میں اپنے پنجے گاڑے ہوئے ہیں، اس وباء سے دو سو زائد ممالک متاثر ہو چکے ہیں۔ بھارت سے ایک خبر آئی ہے جہاں پر بھارتی دفاعی حکام نے ممبئی کے ایک بحری اڈے پر کورونا وائرس وبا پھیلنے کی تصدیق کی ہے۔
تفصیلات کے مطابق بھارتی بحریہ نے اپنے ایک بیان میں کہا ہے کہ کورونا وائرس سے آئی این ایس انگرے میں 26 اہلکار متاثر ہوئے ہیں۔ بحری اڈے سے باہر کسی اور جگہ، بحری جہاز یا سب میرین میں وائرس سے کوئی متاثر نہیں ہوا ہے۔
یہ بھی پڑھیں: فرانسیسی طیارہ بردار جہاز چارلس ڈیگال کے عملے میں کورونا وائرس پھیل گیا
بھارتی وزارت صحت کے مطابق ملک بھر میں کورونا متاثرین کی تعداد 11،906 بنتی ہے جبکہ اس وائرس سے ہلاک ہونے والوں کی تعداد 480 تک پہنچ چکی ہے۔
بحریہ کے حکام کے مطابق اس ماہ کے آغاز میں جو بھی کورونا وائرس سے متاثرہ فوجی سے ملا ان تمام اہلکاروں کے ٹیسٹ کیے گئے ہیں۔ اس دوران بہت سے اہلکاروں میں کورونا وائرس کی تصدیق ہوئی ہے، تاہم ان میں اس بیماری کی علامات ظاہر نہیں ہوئیں۔
یہ بھی پڑھیں: کورونا وائرس: امریکی طیارہ بردار بحری جہاز کا معطل کپتان چل بسا
وہ سب اہلکار جن میں اس وائرس کی تصدیق ہوئی ہے، اس وقت وہ زیر علاج ہیں۔ یہ تمام 21 مریض ایک ہی اپارٹمنٹ میں رہ رہے ہیں جسے اب لاک ڈاؤن کر دیا گیا ہے اور اب کوئی یہاں سے اندر اور باہر نہیں جا سکتا۔
فوجی جوانوں کے نام گزشتہ ہفتے ویڈیو پیغام میں بھارتی بحریہ کے سربراہ ایڈمرل کرمیبر سنگھ نے اس بات کی اہمیت پر زور دیا ہے کہ ہر صورت بحری بیڑوں اور سب میرینز کو اس وائرس سے پاک رکھنا ہے۔
یہ بھی پڑھیں: کورونا وائرس امریکی بیڑے پر پھیلنے لگا، 4 ہزار اہلکاروں کے متاثر ہونے کا خدشہ
کورونا وائرس کی وبا ایک غیر معمولی نوعیت کی ہے، جس کی اس سے قبل کوئی نظیر دیکھنے کو نہیں ملتی۔ ان کا کہنا تھا کہ اس وائرس کے دنیا بھر سمیت انڈیا پر غیر معمولی نوعیت کے اثرات مرتب کیے ہیں۔ بحریہ انڈیا کی کووڈ-19 کے خلاف جاری کوششوں میں بڑا فعال کردار ادا کر رہی ہے۔
بحریہ کے ایک مشہور ہسپتال میں کورونا وائرس سے متاثرہ مریضوں کے علاج کے لیے آئسولیشن جیسی سہولیات سے لے کر بحریہ اس وقت قرنطینہ مراکز بھی چلا رہی ہے۔
بھارتی بحری اڈے کی طرح دوسرے ممالک میں اسی طرح کی جگہوں پر دوسرے ممالک میں بھی اس وبا کے پھیلنے کی خبریں سامنے آئی ہیں۔
واضح رہے کہ یو ایس ایس روزویلٹ میں 500 سے زائد افراد میں اس وائرس کی تصدیق ہوئی ہے اور ان میں سے ایک اس ہفتے کے آغاز میں اس وائرس سے ہلاک ہو چکا ہے۔
فرانس کے ایک طیارہ بردار بحری جہاز چارلس ڈی گول کے ساتھ خدمات انجام دینے والے ملاحوں میں سے ایک تہائی تقریباً 2000 میں سے 668 میں کورونا وائرس کی تصدیق ہوچکی ہے۔
