تہران : (ویب ڈیسک) ایران میں شدید بارشوں سے آنے والے سیلاب کے باعث 69 افراد جاں بحق اور 39 زخمی ہو گئے جبکہ 45 لاپتہ ہیں۔
غیر ملکی میڈیا رپورٹس کے مطابق نیشنل ڈیزاسٹر مینجمنٹ آرگنائزیشن (این ڈی ایم او) کے نائب سربراہ نجاد جہانی نے بتایا کہ ایران میں ہفتے سے جاری شدید بارشوں سے آنے والے سیلاب کے باعث 69 افراد جاں بحق اور 39 زخمی ہو گئے جبکہ 45 لاپتہ ہیں۔
انہوں نے بتایا کہ جاں بحق ہونے والوں میں سے 6زخمیوں میں سے 3 اور لاپتہ ہونے والوں میں سے 3 افراد کا تعلق عراق سے ہے، مزید اموات کے خدشے کا ظہار کیا ہے۔
ایرانی ہلال احمر سوسائٹی کے صدر پیر حسین نے کہا کہ 24 صوبوں کے 661 علاقوں میں امدادی کارروائیاں جاری ہیں، جن میں صوبہ تہران کی کاؤنٹی فیروزکوہ پر توجہ مرکوز کی گئی ہے جہاں سیلاب کی وجہ سے بند سڑکوں کو دوبارہ کھول دیا گیا ہے۔
اصفہان کی تنظیم نظم و نسق کے ڈائریکٹر جنرل منصورنے کہا کہ سیلاب سے صوبہ اصفہان کی 18 کاؤنٹیز میں28.12 ملین ڈالر کا نقصان ہوا ہے، جس سے 4000 ہیکٹر زرعی زمین، 50 ہیکٹر باغات، 30 مویشی پالنے والے یونٹ اور 10 فش فارمنگ یونٹ متاثر ہوئے ہیں۔
انہوں نے بتایا کہ صوبے میں شدید بارشوں سے 98 کلومیٹر سڑکوں اور 61 عمارتوں اور پلوں کو بھی نقصان پہنچا ہے۔
