بیروت (ویب ڈیسک) عرب ملک لبنان کی پارلیمان 11 ویں بار بھی نئے صدر کے انتخاب میں ناکام ہوگئی۔
غیر ملکی خبر رساں ادارے کے مطابق لبنان میں صدر کے انتخاب کیلئے 11 ویں بار پولنگ لبنانی پارلیمنٹ میں ہوئی جہاں صدارتی امیدوار مائیکل مواعد کو 34 ووٹ ملے لیکن ووٹنگ میں حصہ لینے والے 37 ارکان نے بیلٹ پیپرز خالی لوٹا دیے۔
صدارتی امیدوار عیسام خلیفے کو سات، زیادہ برعود کو دو اور ایڈورڈ حنین کو صرف ایک ووٹ ملا،اکتوبر 2022 میں اس وقت کے صدر مائیکل عون کے مستعفی ہونے کے بعد ملک میں ایک نگران حکومت تشکیل پائی تھی۔
لبنان بدترین معاشی بحران سے گزر رہا ہے اور نگران حکومت کو اس کے حل کا ٹاسک دیا گیا تھا۔
لبنان نے اپریل 2022 میں آئی ایم ایف کے ساتھ معاشی اصلاحات اور اینٹی کرپشن اقدامات کے وعدوں کے ساتھ معاہدہ کیا تھا تاہم آئی ایم ایف کی جانب سے لبنان کی پالیسیوں پر گاہے تنقید کی جاتی ہے۔
2019 میں ملک کے معاشی سسٹم کے بیٹھ جانے کے بعد اس کی کرنسی اپنی 95 فیصد قدر کھو چکی ہے ، جمعرات کو لبنانی پاؤنڈ کی قیمت مزید گری اور ایک امریکی ڈالر کے مقابلے میں 50 ہزار پر آگئی۔
