ریاض : (ویب ڈیسک ) سعودی عرب نے فلسطینی شہر جنین اور کیمپ پر اسرائیلی کارروائی کی شدید مذمت کی ہے ۔
خبر رساں ادارے کے مطابق سعودی وزارت خارجہ نے اپنے بیان میں کہا کہ جنین شہر اور کیمپ میں اسرائیلی کارروائی بین الاقوامی قوانین کی خلاف ورزی ہے۔
سعودی عرب نے عالمی برادری پر زور دیتے ہوئے کہا ہے کہ عالمی برادری کو اسرائیل کی جانب سے فلسطینی علاقوں میں پیش قدمی ، جارحیت اور غاصبانہ قبضے کے خلاف اور شہریوں کو تحفظ فراہم کرنے کیلئے اپنا کردار ادا کرنا چاہے۔
واضح رہے کہ گزشتہ روز مغربی کنارے میں قابض اسرائیلی فوج کی فائرنگ سے 61 سالہ خاتون سمیت 10 فلسطینی شہید جبکہ 20 سے زائد زخمی ہو گئے تھے۔
غیر ملکی خبر رساں ادارے کی رپورٹ کے مطابق اسرائیلی فوجیوں نے چھاپوں کے دوران ہسپتال میں بچوں کے وارڈ کے اندر آنسو گیس کی شیلنگ کی ۔
دوسری جانب فلسطینی وزارت صحت نے جنین میں ہونے والے افسوس ناک واقعے پر عالمی ادارہ صحت اور ریڈ کراس کی بین الاقوامی کمیٹی کے ساتھ ہنگامی اجلاس بلانے کا مطالبہ کیا ہے۔
یاد رہے کہ رواں سال جنوری میں اسرائیلی جارحیت سے جاں بحق فلسطینیوں کی تعداد 29 ہوگئی ہے جس میں پانچ بچے بھی شامل ہیں ، ان میں 15 افراد کو جنین میں فائرنگ کا نشانہ بنایا گیا ۔
خبررساں ادارے کی رپورٹ کے مطابق سال 2022 کے دوران اسرائیل اور فلسطین میں 26 اسرائیلی اور 200 فلسطینی جاں بحق ہوچکے ہیں، جاں بحق افراد کی تعداد سب سے زیادہ مغربی کنارے سے رپورٹ ہوئیں۔
اسرائیل نے 1967 کی 6 روزہ جنگ میں مغربی کنارے اور غزہ کی پٹی پر قبضہ کرلیا تھا۔
