نیویارک: (دنیا نیوز) اقوام متحدہ کی سکیورٹی کونسل نے باجوڑ دھماکے کی شدید مذمت کرتے ہوئے کہا ہے کہ ہر قسم اور شکل کی دہشتگردی عالمی امن کیلئے سنگین خطرہ ہے۔
اقوام متحدہ سکیورٹی کونسل نے اپنے اعلامیہ میں حکومت پاکستان اور جاں بحق افراد کے اہل خانہ سے تعزیت کا اظہار کیا اور کہا کہ دھماکے میں زخمی ہونے والے افراد کی جلد صحتیابی کیلئے دعا گو ہیں۔
سکیورٹی کونسل نے تمام متعلقہ ممالک سے باجوڑ واقعے کے مجرمان کے خلاف فیصلہ کن کارروائی کرنے پر زور دیا، سکیورٹی کونسل نے کہا کہ واقعے میں ملوث تمام کرداروں، مالی معاونین اور سہولت کاروں کو جلد از جلد انصاف کے کٹہرے میں کھڑا کرنا چاہیے۔
یو این سکیورٹی کونسل کا مزید کہنا تھا کہ دہشتگردی کی کوئی بھی کارروائی مجرمانہ، بلاجواز اور قابل مذمت ہے۔
