ہریانہ (دنیا نیوز) بھارتی ریاست ہریانہ میں سیاحوں سے بھری بس خوفناک حادثے کا شکار ہوگئی، بس میں آگ لگنے سے 8مسافر زندہ جل گئے۔
بھارتی میڈیا رپورٹس کے مطابق بس اپنے مقام سے مسافروں کو لے کر نکلی ہی تھی کہ بس میں اچانک آگ بھڑک اٹھی ، کچھ ہی دیر میں پوری بس جل کر راکھ ہوگئی ، حادثے میں 8 افراد جھلس کرہلاک جبکہ درجنوں زخمی ہوگئے۔
رپورٹس میں یہ بھی بتایا گیا کہ حادثے میں مرنے والوں کا تعلق چندی گڑھ اور پنجاب کے شہروں سے ہے، بس میں مرد، خواتین اور بچوں سمیت 60 افراد سوار تھے، مرنے والوں اور زخمیوں کو قریبی ہسپتال منتقل کر دیا گیا۔
مقامی افراد نے میڈیا کو بتایا کہ رات گئے انہوں نے دیکھا کہ چلتی ہوئی بس میں آگ لگی ہوئی ہے، ایک نوجوان نے موٹر سائیکل پر بس کا پیچھا کیا اور اپنی موٹر سائیکل بس کے آگے روک کر اسے رکوایا،فائر بریگیڈ کو طلب کیا گیا تب تک بہت دیر ہوچکی تھی۔
