لندن: (ویب ڈیسک) برطانیہ میں الیکشن کے دن قریب آنے کے ساتھ ساتھ انتخابات کی گہما گہمی بھی بڑھ گئی ہے۔
انتخابات میں بھرپور کامیابی حاصل کرنے کیلئے لیبرپارٹی، کنزرویٹیو اور لبرل ڈیموکریٹس کے رہنماؤں کی انتخابی مہم زور شور سے جاری ہے جبکہ 21 لاکھ شہریوں نے ووٹ رجسٹرڈ کروا دیا۔
لندن، برمنگھم، بریڈ فورڈ، مانچسٹر اور گلاسگو سمیت مختلف شہروں میں سیاسی رہنما متحرک ہوگئے ہیں، برمنگھم کے علاقے ہال گرین اینڈ موزلی میں لیبرپارٹی کی غزہ پالیسیوں سے نالاں تین پاکستانی نژاد امیدوار بھی آزاد حیثیت میں میدان میں اترے ہوئے ہیں۔
واضح رہے کہ گزشتہ ماہ کے اواخر میں برطانوی وزیراعظم رشی سونک نے پارلیمنٹ توڑنے کا اعلان کرتے ہوئے 4 جولائی کو نئے انتخابات کا اعلان کیا تھا۔
رائے عامہ سروے کے مطابق اپوزیشن لیبرپارٹی کو حکمران کنزرویٹیو پارٹی پر 20 پوائنٹس کی برتری حاصل ہے۔
