تہران : (دنیانیوز) ایرانی سپریم لیڈر آیت اللہ خامنہ ای نے کہا ہے کہ حماس کے سیاسی ونگ کے سربراہ اور سابق فلسطینی وزیراعظم اسماعیل ہانیہ کے خون کا بدلہ لینا ہمارا فرض ہے۔
ایرانی سپریم لیڈر آیت اللہ خامنہ ای نے حماس رہنما اسماعیل ہانیہ کی شہادت پر اظہار افسوس کرتے ہوئے کہا کہ اسماعیل ہانیہ کے خون کا بدلہ لینا ہمارا فرض ہے، صیہونیوں نے ہمیں جواز فراہم کردیا ہے۔
ایرانی سپریم لیڈر نے کہا کہ یہ قتل ایران کی سرزمین پر کیا گیا ، اسرائیل نے اپنے لیے خود کو سخت سزا کا مستحق قرار دیا ہے۔
دوسری طرف ایرانی صدر مسعود پزشکیان نے آج صبح حماس کے سیاسی بیورو کے سربراہ اسماعیل ہانیہ کے قتل پر اسرائیل کو سنگین نتائج کی دھمکی دیتے ہوئے کہا ہے کہ ہانیہ کے قتل کابدلہ لیا جائے گا اور اسرائیل پچھتائےگا۔
مسعود پزشکیان نے کہا کہ ایران اپنی علاقائی سالمیت اور عزت کا دفاع کرے گا۔
ایرانی پاسداران انقلاب نے آج صبح ایک بیان میں کہا کہ ہانیہ کے قتل کا "سخت اور دردناک جواب دیا جائے گا، ایران اور مزاحمت کا محور اس جرم کا جواب دیں گے۔
ادھر ایرانی حکام نے یہ بھی کہا ہے کہ اسماعیل ہانیہ پر قاتلانہ حملے کی تحقیقات جلد سامنے لائیں گے۔
واضح رہے کہ آج فلسطین کے سابق وزیراعظم اور حماس رہنما اسماعیل ہانیہ کو ایران میں قاتلانہ حملے میں شہید کردیا گیا ، حماس نے ان کی موت کی تصدیق کرتے ہوئے کہا کہ اسماعیل ہانیہ کو یہودی ایجنٹوں نے نشانہ بنایا جس کا بدلہ لیا جائے گا۔
یہ بھی پڑھیں :اسماعیل ہانیہ کی شہادت، حماس کا بھرپور جواب دینے کا اعلان
ایرانی میڈیا کے مطابق حماس کے سیاسی ونگ کے سربراہ پر رات دو بجے تہران میں ان کی رہائش گاہ پر حملہ کیا گیا، وہ ایران کے نئے صدر مسعود پزشکیان کی حلف برداری کی تقریب میں شرکت کے لیے ایران میں موجود تھے۔
مسعود پزشکیان کی حلف برداری کی تقریب میں 70 سے زائد ممالک کے نمائندوں نے شرکت کی تھی ، تاجکستان کے صدر امام علی رحمٰن اور حماس کے رہنما اسماعیل ہانیہ اور اسلامی جہاد کے زیاد النخلیح بھی تقریب میں شریک تھے۔
ایرانی میڈیا کے مطابق اسماعیل ہانیہ کی تدفین جمعہ کو دوحہ میں ہوگی جبکہ ان کی نمازجنازہ کل تہران میں ادا کی جائے گی۔
