تہران: (ویب ڈیسک) ایران کی پاسداران انقلاب نے حزب اللہ کے زیر استعمال پیجرز کے پھٹنے کے واقعات کے بعد اپنے اہلکاروں کے تمام مواصلاتی آلات کے معائنے اور جانچ پڑتال کا فیصلہ کرلیا۔
عالمی خبر رساں ادارے کے مطابق ایران کی پاسداران انقلاب نے تمام کمانڈرز اور اہلکاروں کو ہدایت جاری کی ہے کہ مواصلاتی آلات کی سیکیورٹی کلیئرنس ملنے تک ان کا استعمال نہ کریں۔
پاسداران انقلاب کا کہنا ہے کہ تمام مواصلاتی آلات کا معائنہ کیا جائے گا، جو چین یا روس سمیت دیگر ممالک سے برآمد کیے گئے ہیں بلکہ وہ بھی جنھیں مقامی سطح پر بھی تیار کیا گیا ہو۔
ایران کے پاسداران انقلاب کے 2 کمانڈرز نے میڈیا سے گفتگو میں بتایا کہ یہ احکامات لبنان میں حزب اللہ کے زیر استعمال سیکڑوں پیجرز کے تباہ ہونے کے بعد جاری کیے گئے، اس بات کا خدشہ ہے کہ اسی طرح پاسداران انقلاب کے کمانڈرز کو بھی نشانہ بنایا جا سکتا ہے، اس لیے سیکیورٹی کلیئرنس ضروری ہے۔
خیال رہے کہ لبنان میں چند روز قبل حزب اللہ کے کمانڈرز اور کارکنان کے زیر استعمال 3 ہزار سے زائد پیجرز دھماکوں سے پھٹ گئے تھے جس میں 40 کے قریب جاں بحق اور 3 ہزار سے زائد زخمی ہوگئے تھے۔
