واشنگٹن: (دنیا نیوز) امریکا، کینیڈا ،برطانیہ میں شدید سردی، برفباری اور طوفانی بارشوں سے نظام زندگی مفلوج ہو گیا۔
امریکا میں آگ کے بعد برفانی طوفان نے بھی تباہی مچادی، جنوبی اور وسطی ریاستوں میں برفباری اور بارش سے نظام زندگی درہم برہم ہو گیا، برفانی طوفان سے متعدد راستے، پروازیں اور متعدد تعلیمی ادارے بند ہیں۔
ٹیکساس، اوکلاہوما، آرکنساس میں شدید برفباری اور بارش سے زندگی منجمد ہوگئی، برفانی طوفان کے آنے کی مزید وارننگز جاری کی گئی ہیں۔
کینیڈا میں سخت سردی اور مہنگائی نے شہریوں کی زندگی مشکل بنا دی، شدید برفباری کے سبب بجلی جانے اور سفری مشکلات کا سامنا ہے، راستے بند ہونے سے بعض دیہی علاقوں سے رابطہ منقطع ہو گیا۔
برفباری سے بس سروس بندش کا شکار، پروازیں بھی متاثر ہو گئیں، برطانیہ میں سرد ترین رات کا 15 سالہ ریکارڈ ٹوٹ گیا۔
شمالی سکاٹ لینڈ کے علاقے ہیملٹ میں درجہ حرارت منفی 18.9 ڈگری تک گرگیا، مڈلینڈز اور مشرقی انگلینڈ کے کچھ حصوں میں درجہ حرارت منفی 10 ڈگری تک ریکارڈ کیا گیا۔
سرد موسم کے باعث معمولات زندگی ٹھپ، دفاتر اور سکولز بند ہوگئے، محکمہ موسمیات نے اگلے ہفتے تک سردی کی شدت برقرار رہنے کی پیشگوئی ہے۔
