سرینگر: (دنیا نیوز) کُل جماعتی حریت کانفرنس نے آج مقبوضہ جموں کشمیر میں ہڑتال کی کال دے دی۔
کشمیر میڈیا سروس کے مطابق کُل جماعتی حریت کانفرنس نے بھارت کے متنازع وقف ترمیمی قانون اور مقبوضہ جموں کشمیر میں غیرمقامیوں کو ڈومیسائل دینے کے خلاف ہڑتال کی کال دی ہے۔
حریت کانفرنس کا کہنا ہے کہ آج مقبوضہ جموں کشمیرمیں ہڑتال کی جائے گی، مودی حکومت کے مذموم منصوبوں کے خلاف سری نگر میں احتجاجی مارچ بھی کیا جائے گا۔
کل جماعتی حریت کانفرنس کا کہنا ہے کہ وقف ترمیمی قانون کشمیری اور بھارتی مسلمانوں کے سیاسی، مذہبی اور سماجی تشخص پر حملہ ہے۔
حریت کانفرنس کے مطابق بھارت فالس فلیگ آپریشن کے ذریعے تحریک آزادی کو بدنام کرنے کی کوشش کر رہا ہے، بھارت اوچھے ہتھکنڈوں سے کشمیری عوام کی منصفانہ جدوجہد کو بدنام کر رہا ہے۔
کل جماعتی حریت کانفرنس نے مطالبہ کیا ہے کہ عالمی برادری اقوام متحدہ کی قراردادوں اور سندھ طاس معاہدے کی خلاف ورزیوں پر بھارت کا محاسبہ کرے۔
