ماسکو: (شاہد گھمن) روس کے علاقے کامچاٹکا میں 8.8 شدت کے زلزلے نے تباہی مچا دی، آفٹر شاکس کا سلسلہ جاری ہے، روس کے مشرقی ساحلی علاقوں سے سونامی کی لہریں ٹکرا گئیں۔
غیر ملکی میڈیا کے مطابق روس کے مشرقی علاقے میں زلزلے کا مرکز صرف 20 کلومیٹر اور گہرائی 150 کلومیٹر تھی۔
کامچاٹکا میں ایئرپورٹ پر کچھ لوگوں کے زخمی ہونے کی اطلاعات ہیں، سیویرو کورلسک کے قصے میں متعدد گھر سونامی میں بہہ گئے، 2 ہزار 700 افراد کو محفوظ مقام پر منتقل کیا گیا۔
روسی وزیر کے مطابق زلزلے کے بعد کامچٹکا کے مختلف حصوں میں 3 سے 4 میٹر اونچی سونامی لہریں ریکارڈ کی گئیں۔
زلزلے سے چند افراد کے زخمی ہونے کی اطلاعات بھی ہیں جبکہ ممکنہ سونامی لہروں کے پیش نظر بحرالکاہل میں ایڈوائزری جاری کردی گئی۔
کامچٹکا کے ساحل پر ایک گھنٹے میں 5 کی شدت کے ساتھ کل آٹھ زلزلے آئے، زلزلے کے جھٹکے 7 سے 100 کلومیٹر کی گہرائی میں آئے، ماہرین نے کم از کم ایک ماہ تک 7.5 کی شدت کے آفٹر شاکس کی پیش گوئی کی ہے۔
اس کے علاوہ انڈونیشیا، جاپان اور فلپائن نے بھی ایمرجنسی وارننگ جاری کر دی ہے، امریکا نے کیلی فورنیا، اوریگن اور واشنگٹن میں بھی سونامی وارننگ جاری کر دی، اس کے علاوہ برٹش کولمبیا، ہوائی، الاسکا کیلئے بھی سونامی وارننگ جاری کی گئی ہے، ہوائی میں تمام تجارتی جہازوں اور بندرگاہوں کو خالی کرنے کا حکم دے دیا گیا ہے۔
امریکی جیولوجیکل سروے کے مطابق جاپان میں 20 لاکھ افراد کو سونامی کے باعث انخلا کی وارننگ جاری کر دی گئی،220 شہروں اور قصبوں کیلئے ایڈوائزری جاری کی گئی ہے۔
ہوائی میں حکام نے انخلا کی تیاریاں شروع کر دی، گیس سٹیشنوں پر لوگوں کی لمبی قطاریں لگ گئیں، مشرقی جاپان میں ریلوے سروس معطل کر دی گئی، احتیاطی تدابیر اختیار کرتے ہوئے فوکوشیما ایٹمی مرکز کو خالی کروالیا گیا، فلپائن میں بھی لوگوں کو ساحل پر نہ جانے کی ہدایت کی گئی ہے۔
واضح رہے کہ 20 جولائی کو بھی روس میں 5.0 اور 6.7 شدت کے زلزلے آئے تھے جن پر سونامی کا الرٹ جاری نہیں کیا گیا تھا، تاہم بعد ازاں 7.4 شدت کا زلزلہ 08:49 جی ایم ٹی پر ریکارڈ کیا گیا، جس کے بعد USGS نے خبردار کیا کہ ’کچھ ساحلی علاقوں کے لئے خطرناک سونامی لہروں کی پیش گوئی کی گئی ہے‘۔
ادارے نے بتایا تھا کہ روسی ساحلوں پر 30 سینٹی میٹر سے ایک میٹر (تقریباً 3.3 فٹ) تک بلند لہریں پہنچنے کا خدشہ ہے، جبکہ جاپان اور امریکی ریاست ہوائی میں 30 سینٹی میٹر (ایک فٹ) سے کم اونچی لہروں کی توقع ہے۔
USGS نے بتایا تھا کہ زلزلے کا مرکز بحرالکاہل میں پیٹروپاولووسک کامچاتسکی شہر سے تقریباً 150 کلومیٹر (93 میل) مشرق میں واقع تھا۔
