تہران: (ویب ڈیسک) ایران نے کسی بھی بین الاقوامی ادارے کو جوہری تنصیبات تک رسائی کی اجازت نہ دینے کا فیصلہ کر لیا۔
عالمی میڈیا کی رپورٹ کے مطابق ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے کہا ہے کہ شوریٰ کونسل کے منظور کردہ قوانین کے مطابق کسی بھی حالت میں کسی بین الاقوامی ادارے کو ملکی جوہری تنصیبات تک رسائی کی اجازت نہیں دی جائے گی۔
انہوں نے کہا کہ آئندہ ہفتے ایران کا دورہ کرنے والا جوہری توانائی کے بین الاقوامی ادارے ( آئی اے ای اے) کا وفد حکام اور ماہرین کے ساتھ صرف تکنیکی اور پیشہ ورانہ بات چیت اور مشاورت کا مجاز ہوگا، انہوں نے ان افواہوں کی تردید کی کہ آئی اے ای اے ایران کی جوہری تنصیبات کا معائنہ دوبارہ شروع کرے گا۔
ابراہیم عزیزی نے کہا کہ پارلیمنٹ کے منظور شدہ قوانین کسی بھی وفد یا غیر ملکی فریق کو جوہری تنصیبات میں داخل ہونے سے مکمل طور پر روکتے ہیں، اس وفد یا کسی اور کو کسی بھی قسم کے معائنے کی اجازت نہیں۔
قومی سلامتی کمیٹی کے سربراہ نے زور دیا کہ یہ پابندیاں مستقل اور ناقابلِ تبدیلی ہیں اور ان کی مکمل پاسداری میں کوئی نرمی نہیں ہوگی، انہوں نے نشاندہی کی کہ اس دورے کے حوالے سے ایرانی حکومت اور جوہری توانائی تنظیم کے پروگرام میں کسی بھی طرح سے ایسے مسائل پر بحث شامل نہیں جن میں ادارے کے مطالبے کے مطابق تنصیبات تک رسائی یا معائنہ کا نفاذ بھی ہو۔
ان کا مزید کہنا تھا کہ ایران کی طرف سے پیش کئے گئے موضوعات مکمل طور پر اجازت شدہ تکنیکی تعاون کے فریم ورک کے اندر ہیں، ان کا مقصد صرف تکنیکی آرا کا تبادلہ اور کچھ تکنیکی ابہام یا مسائل کو دور کرنا ہے۔
