بیجنگ: (ویب ڈیسک) چین نے غزہ شہر پر قبضے کے اسرائیلی منصوبے پر سخت تشویش کا اظہار کرتے ہوئے اسرائیل پر زور دیا ہے کہ وہ فوری طور پر اپنے خطرناک اقدامات بند کرے۔
عالمی میڈیا کی رپورٹ کے مطابق چینی وزارت خارجہ کے ترجمان نے جاری پیغام میں کہا کہ غزہ فلسطینی عوام کا ہے اور یہ فلسطینی سرزمین کا ناقابلِ تقسیم حصہ ہے۔
انہوں نے مزید کہا کہ غزہ میں انسانی بحران کو کم کرنے اور یرغمالیوں کی رہائی کو یقینی بنانے کا صحیح راستہ فوری جنگ بندی ہے، ترجمان نے کہا کہ غزہ تنازع کا مکمل حل جنگ بندی پر منحصر ہے، تب ہی کشیدگی میں کمی کی راہ ہموار ہو سکتی ہے اور علاقائی سلامتی کو یقینی بنایا جا سکتا ہے۔
چین نے کہا کہ وہ غزہ میں جلد اسرائیلی جنگ ختم کرنے میں مدد کے لئے بین الاقوامی برادری کے ساتھ مل کر کام کرنے کے لئے تیار ہے۔
واضح رہے کہ اسرائیلی وزیر اعظم کے دفتر نے جمعہ کو بیان میں کہا کہ اسرائیلی فوج وزیر اعظم بنجمن نیتن یاہو کے تجویز کردہ اور ان کی سکیورٹی کابینہ کے ذریعے منظور کئے گئے منصوبے کے تحت غزہ پر قبضہ کرلے گی۔
