غزہ: (دنیا نیوز) حماس نے مصر کا جنگ بندی کا منصوبہ قبول کرلیا۔
حماس دو مراحل میں اسرائیلی قیدی رہا کرے گی، حماس نے اسرائیل کے ساتھ جنگ بندی مذاکرات بڑھانے پر اتفاق کیا، قطر اور مصر نے اسرائیل کو حماس کے سیز فائر مؤقف سے آگاہ کر دیا، مصر کی جنگ بندی کی تجویز اسرائیل کو موصول ہوگئی، اسرائیلحماس کی سیز فائر آمادگی کے باوجود جنگ جاری رکھنے پر بضد ہے۔
یہ بھی پڑھیں: حماس نے غزہ سے فلسطینیوں کی بے دخلی مسترد کر دی
غیر ملکی خبررساں ادارے کے مطابق حماس کے ایک سینئر ممبر نے بتایا کہ گروپ کو غزہ میں 22 ماہ سے زائد عرصے سے جاری لڑائی کو ختم کرنے کے لئے تازہ سفارتی کوششوں میں کامیابی حاصل ہوئی ہے۔
واضح رہے کہ امریکا کی حمایت سے مصر اور قطر اس طویل المدتی جنگ بندی کے حصول میں جدوجہد کر رہے تھے، ثالثوں کی جانب سے نیا منصوبہ موصول ہونے کے بعد حماس نے کہا کہ وہ مذاکرات کے لئے تیار ہے۔
حماس کے سینئر رہنما باسم نعیم نے فیس بک پر کہا کہ تنظیم نے اپنا جواب جمع کرایا ہے اور ثالثوں کی نئی تجویز سے اتفاق کر لیا ہے، ہم اللہ سے دعا کرتے ہیں کہ وہ ہمارے عوام پر یہ مسلط کی گئی جنگ ختم کر دے۔
یہ بھی پڑھیں: حماس کی جانب سے مطالبات میں نرمی، اسرائیل کی ہٹ دھرمی برقرار
اس سے قبل حماس کے ایک ذرائع نے اے ایف پی کو بتایا تھا کہ گروپ نے اس تجویز کو ’کسی بھی ترمیم کے بغیر قبول کر لیا ہے، دوسری جانب، مصر کی جانب سے جاری بیان میں کہا گیا کہ ہم نے قطر کے ساتھ ملکر نئی تجویز اسرائیل کو بھیج دی ہے اور اب معاملہ اسرائیل کے کورٹ میں ہے تاہم اسرائیل نے اس حوالے سے تاحال کوئی جواب نہیں دیا۔
مذاکرات سے واقف ایک فلسطینی ذرائع نے بتایا کہ ثالثوں سے توقع ہے کہ وہ معاہدہ طے پانے کا اعلان کریں گے اور مذاکرات دوبارہ شروع کرنے کی تاریخ طے کریں گے، انہوں نے مزید کہا کہ یہ یقین دہانیاں بھی دی گئی ہیں کہ اس معاہدے پر عمل درآمد ہو گا اور مستقل حل کی کوشش کی جائے گی۔
یہ بھی پڑھیں: اسرائیلی فورسز کے بھوک سے بلکتے فلسطینیوں پر حملے، مزید 60 شہید، 344 زخمی
یاد رہے کہ اکتوبر 2023 میں حماس کے اسرائیل پر حملے کے نتیجے میں 1219 اسرائیلی ہلاک ہوئے تھے، حماس حملے کے دوران 251 یرغمالی بنائے گئے تھے، جن میں سے اب بھی 49 غزہ میں موجود ہیں، ان میں 27 وہ ہیں جنہیں اسرائیلی فوج مردہ قرار دے چکی ہے۔
اسرائیلی جارحیت کے نتیجے میں اب تک 62 ہزار سے زائد فلسطینی شہید ہو چکے ہیں، جن میں زیادہ تر عام شہری اور خاص طور پر خواتین اور بچے شامل ہیں۔
