نیویارک: (ویب ڈیسک) امریکی اخبار وال سٹریٹ جرنل نے رپورٹ دی ہے کہ پینٹاگون نے یوکرین کو امریکی ساختہ طویل فاصلے تک مار کرنے والے میزائلوں کے ذریعے روسی سرزمین پر حملے کرنے سے روک دیا ہے۔
رپورٹ میں کہا گیا ہے کہ یہ پالیسی رواں سال بہار سے نافذ ہے اور ایک موقع پر واشنگٹن نے کیف کی درخواست مسترد بھی کی تھی، اخبار نے اس فیصلے کو صدر ڈونلڈ ٹرمپ کی نئی امن کوششوں سے جوڑا ہے۔
گزشتہ ہفتے ٹرمپ نے الاسکا میں روسی صدر ولادیمیر پوٹن سے 2019 کے بعد پہلی ملاقات کی، جس کے بعد واشنگٹن میں یوکرین، نیٹو، یورپی یونین اور یورپی ممالک کے رہنماؤں سے بھی بات چیت کی۔
ٹرمپ نے کہا کہ یوکرین روس کو نشانہ بنائے بغیر جنگ نہیں جیت سکتا، تاہم انہوں نے ماسکو اور کیف دونوں پر زور دیا کہ جلد از جلد امن معاہدے پر پہنچیں۔
ٹرمپ ماضی میں یوکرین کو دی جانے والی غیر مشروط فوجی امداد پر بھی تنقید کر چکے ہیں اور فروری میں صدر زیلنسکی پر تیسری عالمی جنگ کا خطرہ مول لینے کا الزام عائد کیا تھا۔
ادھر روس نے خبردار کیا ہے کہ یوکرین کو ہتھیار فراہم کرنے والے مغربی ممالک دراصل جنگ میں براہِ راست شریک ہیں، ماسکو نے پائیدار جنگ بندی کے لیے غیر ملکی فوجی امداد کے خاتمے کو اپنی بنیادی شرط قرار دیا ہے۔
