تہران: (دنیا نیوز) ایران جوہری پروگرام پر سفارتی مذاکرات دوبارہ شروع کرنے پر آمادہ ہوگیا۔
عالمی میڈیا کی رپورٹ کے مطابق ایران کے وزیر خارجہ عباس عراقچی نے کہا ہے کہ اگر مغربی ممالک سنجیدگی اور خیرسگالی کا مظاہرہ کریں تو ایران جوہری پروگرام پر سفارتی مذاکرات دوبارہ شروع کرنے کے لئے تیار ہے۔
ایران وزیرخارجہ عباس عراقچی نے جوہری پروگرام پر مذاکرات کے حوالے سے یورپی یونین کی خارجہ پالیسی کی سربراہ کاجاکالاس کو خط لکھ دیا، عباس عراقچی نے خط میں لکھا کہ ایران کی جانب سے مذاکرات کی بحالی کا انحصار اس بات پر ہے کہ فریقین سنجیدگی اورخیرسگالی کا مظاہرہ کریں اور ایسے اقدامات سے گریز کریں جو کامیابی کے امکانات کو نقصان پہنچا سکتے ہیں۔
واضح رہے کہ ایرانی مؤقف ایسے وقت سامنے آیا ہے جب برطانیہ، فرانس اور جرمنی نے ایران پر دوبارہ اقوام متحدہ کی پابندیاں عائد کرنے کے لئے باضابطہ عمل کا آغاز کر دیا ہے۔
تینوں یورپی ممالک کے اقوام متحدہ سلامتی کونسل کو لکھے گئے خط میں کہا گیا ہے کہ ایران نے جوہری پروگرام سے متعلق وعدوں کی پاسداری نہیں کی، ایران 2015ء کے جوہری معاہدے کے تحت اپنی ذمہ داریوں کی خلاف ورزی کا مرتکب ہوا ہے۔
تینوں ملکوں کے مطابق پابندیوں کے اسنیپ بیک میکنزم کو فعال کر رہے ہیں، اس میکنزم کے تحت پابندیاں دوبارہ عائد ہونے کا عمل 30 روز میں فعال ہو جائے گا۔
واضح رہے کہ گزشتہ دنوں ایران کے 3 یورپی ممالک کے ساتھ نئے جوہری معاہدے پر بات چیت کے ادوار بھی ہوئے ہیں۔
