ماسکو: (ویب ڈیسک) روس نے یوکرین کے دارالحکومت کیف پر ڈورنز اور میزائلوں کے ساتھ اس تین سال سے جاری لڑائی کا اب تک کا سب سے بڑا فضائی حملہ کیا ہے۔
امریکی خبر رساں ادارے کے مطابق اس حملے کے نتیجے میں دو افراد ہلاک ہوئے جبکہ کیف میں ایک اہم سرکاری عمارت سے دھوئیں کے مرغولے فضاء میں بلند ہوتے دیکھے گئے ہیں۔
یوکرینی حکام کے مطابق روس نے یوکرین پر 805 ڈورن فائر کیے ہیں۔
یوکرین کی ایئر فورس کے ترجمان یوریے اہنت اس بات کی تصدیق کی ہے کہ یہ روس کی جانب سے اب تک کا سب سے بڑا حملہ تھا، روس نے مختلف اقسام کے 13 میزائل بھی فائر کیے ہیں۔
یوکرین کی ایئر فورس نے اپنے بیان میں بتایا کہ انہوں نے 747 ڈرونز اور چار میزائلوں کو مار گرایا ہے۔
یوکرین کی کابینہ کے لیے مختص عمارت سے دھواں اٹھتے ہوئے دیکھا گیا، کابینہ کی عمارت پر حملے کی تصدیق یوکرینی وزیراعظم نے بھی کر دی، اس عمارت میں یوکرین کی کابینہ کے ارکان رہتے ہیں اور ان کے دفاتر بھی یہیں واقع ہیں۔
یوکرین کی وزیراعظم یولیا سیوریدنکو نے کہا ہے کہ یہ پہلا موقع ہے کہ دشمن کے حملے میں سرکاری عمارت کا نقصان ہوا ہے، اس کی چھت اور بالائی منزل متاثر ہوئی ہے۔
انہوں نے کہا کہ دنیا کو اس تباہی کا لفظوں سے نہیں بلکہ عملی طور پر جواب دینا چاہئے اس وقت روس پر تیل اور گیس کی پابندیوں کے ذریعے دباؤ بڑھانے کی ضرورت ہے۔
اس سے قبل یوکرین کے صدر ولادیمیر زیلنسکی نے امن معاہدے کے لیے روسی صدر دلادیمیر پوتن سے ملنے پر رضامندی کا اظہار کیا تھا اور امریکہ پر زور دیا تھا کہ وہ سخت پابندیاں عائد کر کے روس کو جنگ ختم کرنے پر مجبور کرے۔
