نیویارک: (دنیا نیوز) اقوام متحدہ جنرل اسمبلی اجلاس میں شرکت کے لیے نیویارک پہنچنے والے فرانسیسی صدر میکرون کو پولیس نے صدر ٹرمپ کے قافلے کے گزرنے کے سبب روک دیا، میکرون نے ٹرمپ کو فون کرکے راستے کھلوانے کی درخواست کر دی۔
گزشتہ روز فرانسیسی صدر میکرون نیویارک میں اقوام متحدہ کی کانفرنس میں فلسطین کو تسلیم کرکے قریب ہی واقع فرانسیسی سفارتخانے کے لیے نکلے تو ان کے قافلے کو سڑک پر روک لیا گیا۔
پتہ چلاکہ صدر ٹرمپ کے قافلے کا پروٹوکول لگا ہوا ہے ، انہوں نے گزرنا ہے اس لیے راستے بند ہیں ۔
ایسے میں فرانسیسی صدر نے خود گاڑی سے نکل کر پولیس آفیشلز سےبات کی لیکن انہیں پیار محبت سے سمجھادیا گیا کہ راستہ تو بند ہی رہے گا۔
امریکی پولیس نے فرانسیسی صدر کو سڑک پر روک لیا، میکرون نے ٹرمپ کو فون گھما دیا
اس پر میکرون نے بھی ہمت نہيں ہاری اور سڑک پر کھڑے کھڑے ہی صدر ٹرمپ کو فون کھڑکا دیا اور پھرحال احوال پوچھتے ہی ان سے اٹھکیلیاں بھی شروع کردیں۔ فرانسیسی صدر نے پوچھا کہ اچھا ذرا بوجھو تو کہ میں نے آپ کو فون کیوں کیا ہے ؟
دوسری طرف سے نہ جانے ٹرمپ نے کیا جواب دیا ، تو میکرون بولے کہ وہ سڑک پر کھڑے ہیں اور راستہ بند ہے کیوں کہ آپ نے گزرنا ہے۔ صدر ٹرمپ نے بھی غالباً ٹرخا دیا اور راستے پھر بھی نہيں کھلے ۔
جس کے بعد فرانسیسی صدر نے پیدل ہی جانے کی ٹھان لی لیکن انہیں اکیلے کو بھی سڑک کراس کرنے کی اجازت نہیں دی گئی تو انہیں مجبوراً قافلہ گزرنے کا انتظار ہی کرنا پڑا۔
اس کے بعد میکرون کو بھی ضد آگئی کہ اب گاڑی میں نہيں جاؤں گا ، وہ پیدل ہی فرانسیسی سفارت خانے کی طرف روانہ ہوئے ۔ راستے میں کچھ لوگوں نےپہچان کر فرانسیسی صدر کے ساتھ تصاویر بھی بنوائيں۔
واضح رہے کہ فرانس نے گزشتہ روز یواین میں ہونے والی فلسطین کانفرنس میں فلسطین کو تسلیم کرنے کا اعلان کیا تھا۔
