بیجنگ: (ویب ڈیسک) چین نے آسٹریلیا سے فضائی حدود کی خلاف ورزی، اشتعال انگیزی اور پراپیگنڈا بند کرنے کا مطالبہ کر دیا۔
عالمی میڈیاکی رپورٹ کے مطابق آسٹریلیا کی وزارت دفاع نے حال ہی میں ایک بیان میں کہا کہ 19 اکتوبر کو آسٹریلوی فضائیہ کے جہاز ’’پی8 اے ‘‘ کی بحیرہ جنوبی چین میں پرواز کے دوران چینی فوجی طیارے نے اسے غیر محفوظ اور غیر پیشہ ورانہ طور پر انٹرسیپٹ کیا، آسٹریلوی جہاز اور پائلٹ کو خطرہ لاحق ہوا۔
چینی وزارت دفاع کے ترجمان جیانگ بین نے بیان پر تبصرہ کرتے ہوئے کہا کہ آسٹریلیا کا بیان حقائق کو مسخ کرتا ہے اور یہ چینی فضائی حدود میں اپنے طیارے کی غیر قانونی پرواز کو چھپانے کی کوشش ہے، چین اس بیان کی سخت مخالفت کرتا ہے۔
ترجمان نے اس بات پر زور دیا کہ پیپلز لبریشن آرمی کے سدرن تھیٹر کمانڈ نے چینی فضائی حدود میں غیر قانی طور پر داخل ہونے والے آسٹریلوی فوجی طیارے کو روکنے اور حدود سے باہر نکالنے کے اقدامات کئے یہ اقدامات جائز، قانونی، پیشہ ورانہ اور پرامن تھے۔
ترجمان نے کہا کہ چین آسٹریلیا پر زور دیتا ہے کہ وہ فوری طور پر ان خلاف ورزیوں، اشتعال انگیزیوں اور پراپیگنڈا کو روکے اور اپنی فضائی و بحری افواج کی کارروائیوں پر سخت کنٹرول رکھے تاکہ چین اور آسٹریلیا کی حکومتوں اور افواج کے درمیان تعلقات خراب ہونے سے بچ سکیں۔
ان کا مزید کہنا تھا کہ چینی فوج ملکی خودمختاری اور سلامتی کی حفاظت اور خطے میں امن و استحکام کے تحفظ کے لئے تمام ضروری اقدامات جاری رکھے گی۔
