ابوجا: (ویب ڈیسک) نائیجیریا کی حکومت نے ایک ماہ قبل کیتھولک سکول سے اغوا کیے گئے 100 بچوں کی بحفاظت بازیابی یقینی بنا لی۔
امریکی میڈیا کے مطابق یہ واقعہ نائیجیریا کی حالیہ تاریخ کے بدترین اجتماعی اغواؤں میں شمار ہوتا ہے، 21 نومبر کو مسلح افراد نے سینٹ میری کیتھولک بورڈنگ سکول، پاپیری پر دھاوا بول کر 303 بچوں اور 12 سٹاف کو اغوا کر لیا تھا۔
اس موقع پر فائرنگ اور بھگدڑ کے دوران 50 بچے فرار ہونے میں کامیاب ہوئے تھے تاہم باقی بچوں اور عملے کے بارے میں کئی ہفتوں تک کوئی اطلاع نہیں ملی تھی۔
مقامی نشریاتی ادارے نے بچوں کی رہائی کی تصدیق تو کی مگر اس کی تفصیلات فوری طور پر جاری نہیں کی گئیں، ریاستی حکام اور مسیحی تنظیم کی جانب سے کہا گیا ہے کہ وفاقی حکومت نے انہیں باضابطہ طور پر ابھی آگاہ نہیں کیا۔
کرسچین تنظیم کے ترجمان ڈینیئل اٹوری کا کہنا تھا کہ ہمیں ابھی تک حکومت کی جانب سے باضابطہ اطلاع نہیں ملی، مگر امید ہے خبر درست ہو، ہم باقی بچوں کی جلد بازیابی کے منتظر ہیں۔
