اسلام آباد: (دنیا نیوز) گورنر سٹیٹ بینک جمیل احمد نے کہا ہے کہ آئندہ مالی سال میں جاری کھاتوں کا خسارہ 4 ارب ڈالر رہنے کی توقع ہے۔
گورنر سٹیٹ بینک جمیل احمد نے مانیٹری پالیسی کے بعد معاشی تجزیہ کاروں کو بریفنگ دیتے ہوئے کہا کہ روشن ڈیجیٹل اکاؤنٹس میں اپریل 2023ء تک آنے والے 6.1 ارب ڈالر جمع کیے گئے، روشن ڈیجیٹل اکاؤنٹ میں آنے والے ڈالرز میں سے 3.5 ارب ڈالر خرچ ہوگئے جبکہ اوورسیز پاکستانی 1.4 ارب ڈالر واپس لے گئے۔
انہوں نے بتایا کہ آر ڈی اے سے 1.1 ارب ڈالر مزید نکال کر روپوں میں تبدیل کروا لیا، آئندہ مالی سال پاکستان کو 23 ارب ڈالر کا قرض اور سود ادا کرنا ہے، بیرونی اور اندرونی قرض کی ری سٹرکچرنگ کا کوئی ارادہ نہیں ہے۔
اپنے ایک بیان میں گورنر سٹیٹ بینک نے کہا کہ رواں ماہ 3.6 ارب ڈالر قرض ادا کرنا ہے، قرض کی مد میں اب تک 40 کروڑ ڈالر ادا کر دیے گئے ہیں، 2.3 ارب ڈالر کے بیرونی قرضے رول اوور ہوجائیں گے، 90 کروڑ ڈالر کو رواں ماہ فنانس کرنا اہم ضرورت ہے۔
