کراچی: (دنیا نیوز) سٹیٹ بینک آف پاکستان نے اعلان کیا ہے کہ زکوٰۃ کی کٹوتی کے مقصد کیلئے تمام بینک اور مالیاتی ادارے یکم رمضان کو بند رہیں گے۔
مرکزی بینک اس سلسلے میں باضابطہ نوٹیفکیشن جاری کرے گا، بینک ملازمین کو معمول کے مطابق کام کرنے اور ڈیوٹی انجام دینے کیلئے رپورٹ کریں گے، تاہم عوامی لین دین نہیں کریں گے۔
واضح رہے کہ پاکستان میں رمضان المبارک کا مقدس مہینہ 2 مارچ 2025 کو شروع ہونے کا امکان ہے، یکم مارچ کی شام کو ماہ رمضان کا چاند نظر آنے کا امکان ہے۔
سپارکو کے مطابق نیا چاند 28 فروری کو پاکستان کے معیاری وقت کے مطابق شام 5 بجکر 45 منٹ پر نکلنے کا امکان ہے۔
زکوٰۃ کی کٹوتی کو آسان بنانے کیلئے رمضان کے پہلے دن بینک کی تعطیل کا عمل ایک دیرینہ عمل رہا ہے جو کہ ملک کے بینکاری ضوابط کے تحت لازمی ہے۔
اس برس زکوۃ نصاب ایک لاکھ 79 ہزار 689 روپے مقرر کیا گیا ہے، نصاب سے کم رقوم پر زکوۃ کٹوتی نہیں ہوگی، کرنٹ اکاؤنٹ سے زکوۃ کٹوتی نہیں کی جائے گی، صرف سیونگ اور دیگر اکاؤنٹس سے زکوۃ کٹوتی ہوگی۔
