اسلام آباد: (دنیا نیوز) وفاقی وزیر خزانہ محمد اورنگزیب کی پاکستان بزنس کونسل کے وفد کو مشاورتی عمل جاری رکھنے کی یقین دہانی کرا دی۔
پاکستان بزنس کونسل کے وفد نے سی ای او احسن ملک اور نئے نامزد سی ای او جاوید قریشی کے ہمراہ وفاقی وزیر خزانہ سینیٹر محمد اورنگزیب سے ملاقات کی، جس میں وزیر خزانہ نے وفد کو پالیسی سازی میں مشاورتی عمل کے تسلسل کی یقین دہانی کراتے ہوئے کونسل میں قیادت کی تبدیلی کا خیر مقدم کیا اور پاکستان بزنس کونسل کے مثبت کردار کو سراہا۔
وزیر خزانہ نے بتایا کہ حکومت کاروباری برادری کے اہم سٹیک ہولڈرز کے ساتھ مشاورت پر مبنی پالیسی سازی کے عمل کو مسلسل جاری رکھنا چاہتی ہے۔
محمد اور نگزیب نے پالیسی معاملات میں کونسل کے تحقیقی کام اور مختلف شعبوں سے متعلق ڈیٹا نہایت مفید ہوتا ہے، حکومت نے پالیسی سازی کو مزید مؤثر اور مربوط بنانے کیلئے ٹیکس پالیسی آفس کو ایف بی آر سے نکال کر وزارتِ خزانہ میں منتقل کر دیا ہے۔
انہوں نے بتایا کہ اس اقدام کا مقصد پاکستان بزنس کونسل جیسے فورمز کے ساتھ مشاورت کے ادارہ جاتی عمل کو فروغ دینا ہے، حکومت کاروباری و صنعتی طبقے کی آرا اور تجاویز کو نہایت اہمیت دیتی ہے۔
وزیر خزانہ نے کہا کہ اسی ویژن کے تحت وفاقی بجٹ 26-2025 کیلئے مشاورتی عمل کا آغاز اس سال غیر معمولی طور پر جلد کر دیا گیا، تاکہ مختلف چیمبرز، تجارتی تنظیموں اور کاروباری فورمز سے موصول ہونے والی تجاویز پر تفصیل سے غور کیا جا سکے اور انہیں بجٹ سازی میں بہتر طور پر شامل کیا جا سکے۔
