لاہور:(دنیا نیوز) گورنر پنجاب سردار سلیم حیدر خان سے ویمن چیمبر آف کامرس اینڈ انڈسٹری گجرات کے وفد نے ملاقات کی۔
ملاقات کے دوران میں ملکی معیشت اور کاروباری معاملات سمیت خواتین کے کردار پر تبادلہ خیال کیا، صدر ویمن چیمبر گجرات صائمہ سرفراز اور تاجر رہنما وقار ایوب بٹ نے وفد کی قیادت کی۔
گورنر پنجاب کا کہنا تھا کہ ملک کی معاشی دوڑ میں خواتین بڑھ چڑھ کر حصہ لے رہی ہیں، سیاست، تجارت اور زندگی کے ہر شعبے میں خواتین نے اپنا لوہا منوایا، بچیوں کو پڑھانے لکھانے اور اتنی ڈگریاں حاصل کرا کے گھروں میں نہ بٹھائیں، بلکہ باہر نکل کر اپنی صلاحیتوں سے ملک کی ترقی میں اپنا کردار ادا کریں۔
سلیم حیدر خان نے کہا کہ پیپلزپارٹی نے ہمیشہ اپنے دورہ اقتدار میں خواتین کے لیے سرکاری ملازمت میں کوٹہ رکھا اور روزگار کے مواقع فراہم کئے، خواتین کی ہراسمنٹ کے خلاف حکومت زیرو ٹالرنس اختیار کیے ہوئے ہے، پاکستان کی پڑھی لکھی خواتین کو معاشرے میں آگے آکر ملک کی باگ دوڑ میں اپنا کردار ادا کرنا چاہیے۔
ان کا کہنا تھا کہ ہمارے ملک کی سیاست میں محترمہ فاطمہ جناح، بے نظیر بھٹو ایک مثال ہیں، خواتین کاروباری وتجارتی سرگرمیوں میں عملی طور پر حصہ لیں تاکہ خواتین کو بااختیار بنایا جائے۔
گورنر پنجاب نے مزید کہا کہ صدر پاکستان آصف علی زرداری کے حکم کے مطابق گورنر ہاؤس کے دروازے تاجر برادری کے مسائل حل کے لیے ہر وقت کھلے ہیں،میرا خواتین کو معاشی طور پر بااختیار بنانے اور معاشرے میں باعزت مقام دلانے کے لیے بھرپور تعاون رہے گا۔
