اسلام آباد: (دنیا نیوز) وفاقی وزیر پٹرولیم علی پرویز ملک سے بنگلا دیش کے ہائی کمشنر اقبال حسین نے ملاقات کی جس میں توانائی اور معدنی وسائل کے شعبوں میں تعاون کے فروغ پر تبادلہ خیال کیا گیا۔
اعلامیے کے مطابق وزیراعظم شہباز شریف پاکستان اور بنگلا دیش کے درمیان باہمی تعاون بڑھانے کے لیے پرعزم ہیں، وفاقی وزیر پٹرولیم علی پرویز ملک اور بنگلا دیش کے ہائی کمشنر اقبال حسین کی ملاقات میں دونوں ممالک نے لائم سٹون، کوئلہ اور پٹرولیم مصنوعات کے شعبوں میں ممکنہ شراکت داری پر کام کرنے پر اتفاق کیا۔
اس موقع پر وفاقی وزیر پٹرولیم علی پرویز ملک نے کہا ہے کہ پاکستان اور بنگلا دیش توانائی کے شعبے میں مشترکہ منصوبوں پر مل کر کام کریں گے۔
بنگلا دیشی ہائی کمشنر اقبال حسین نے اس موقع پر پاکستان کے ساتھ اقتصادی اور توانائی تعاون کو مزید مستحکم کرنے کی خواہش کا اظہار کیا۔
