لاہور: (دنیا نیوز) کرکٹ آسٹریلیا کے مطابق جولائی میں پاکستان، آسٹریلیا اور زمبابوے کے درمیان تین ملکی ٹی 20 انٹرنیشل سیریز زمبابوے میں کھیلی جائے گی۔ یکم جولائی سے شروع ہونے والے اس ٹی 20 سہ ملکی ٹونامنٹ میں کل سات میچ کھیلے جائیں گے
یہ تین ملکی سیریز زمبابوے کے دارالحکومت ہرارے میں واقع ہرارے سپورٹس کلب میں کھیلی جائے گی جبکہ بلاوائیو پاکستان کے خلاف ایک روزہ میچوں کی سیریز کی میزبانی کرے گا۔ یہ 2014 کے بعد آسٹریلیا کا زمبابوے کا پہلا دورہ ہو گا جبکہ آسٹریلیا پہلی بار زمبابوے میں ٹی 20 میچوں میں سامنا کرے گا۔
یکم جولائی سے شروع ہونے والے اس ٹی 20 سہ ملکی ٹونامنٹ میں کل سات میچ کھیلے جائیں گے۔ تینوں ٹیمیں آپس میں دو، دو میچ کھیلیں گی جبکہ فائنل میچ آٹھ جولائی کو کھیلا جائے گا۔ تین ملکی سیریز کے بعد زمبابوے اور پاکستان کے مابین پانچ ایک روزہ میچوں کی سیریز بھی کھیلی جائے گی۔
زمبابوے کرکٹ کے مینیجنگ ڈائریکٹر فیصل حسنین کا کہنا تھا کہ کئی ماہ کے مذاکرات کے بعد ہمیں یہ تصدیق کرتے ہوئے خوشی ہے کہ ہم پاکستان اور آسٹریلیا کے ساتھ تین ملکی ٹی 20 سیریز کھیل رہے ہیں، جس کے بعد پاکستان کے خلاف ایک روزہ سیریز بھی منعقد ہو گی۔
