لاہور: (دنیا نیوز) انٹرنیشنل کرکٹ کونسل نے مین اور ویمن ٹی 20 ورلڈکپ کے شیڈول کا اعلان کر دیا، چھوٹے فارمیٹ کے بڑے مقابلے کینگروز کے دیس شیڈول ہیں۔
آسٹریلوی سرزمین پر آئندہ سال ٹی ٹوئنٹی ورلڈکپ کے میلے سجیں گے،آئی سی سی نے مکمل شیڈول کا اعلان کر دیا۔ مینز اور ویمن ٹیموں کو دو گروپس میں تقسیم کیا ہے۔
خواتین کے عالمی کرکٹ مقابلے 21 فروری سے آٹھ مارچ تک جاری رہیں گے۔ گروپ اے میں میزبان آسٹریلیا کے ساتھ بھارت، سری لنکا، نیوزی لینڈ اور ایک کوالیفائر جبکہ گروپ بی میں ویسٹ انڈیز، انگلینڈ، جنوبی افریقہ، پاکستان اور ایک کوالیفائر ٹیم ہو گی۔
مردوں کے ٹی ٹوئنٹی ٹائٹل مقابلے اٹھارہ اکتوبر سے پندرہ نومبر تک شیڈول ہیں، بارہ ٹیموں کو بھی دو گروپس میں تقسیم کیا گیا ہے۔ مینز گروپ میں پاکستان کے ساتھ آسٹریلیا، ویسٹ انڈیز، نیوزی لینڈ اور دو کوالیفائر ٹیمیں دوسرے گروپ میں بھارت، انگلینڈ، جنوبی افریقہ، افغانستان اور دو کوالیفائر ٹاپ رینک ٹیمیں شامل ہیں۔ پاکستان چوبیس اکتوبر سے اپنی مہم کا آغاز کرے گا۔
